وروستي‌سیلاب ځپلي عاجلو مرستو ته اړتیا لري

په وروستیو کې د افغانستان ختیځې سیمې، په ځانګړې توګه ننګرهار، کونړ او لغمان ولایتونه، سختو توپانونو او بارانونو ځپلې دي. دې طبیعي افتونو د یادو سیمو خلکو ته ستر مالي او ځاني زیانونه اړولي، چې په دې لړ کې ماشومان او کورنۍ زیات اغېزمن شوي دي. د ماشومانو د ساتنې ادارې (سيف ده چلډرن) په خپل وروستي راپور کې ویلي چې په دې پېښو کې ۱۵۰۰ افغان ماشومان بې‌کوره شوي دي. د دې ادارې په وینا، لږترلږه اته‌نیم لکه ماشومان په هغو ولسوالیو کې اوسېږي چې توپانونو او بارانونو سخت اغېز پرې کړی دی. له دې ډلې څخه د یو نیم زر ماشومانو کورونه ړنګ شوي او اوس بې‌کوره پاتې دي.
دغه پېښې د خلکو ژوند او مال ته ستر خطر پېښ کړی دی، او اړینه ده چې نړیوال خیریه سازمانونه، افغان سوداګر او ټول هغه هیوادوال چې له اقتصادي پلوه توان لري، دې پېښو ځپلو خلکو ته عاجلې مرستې ورسوي. د افغانانو ترمنځ همدردي او یووالي په داسې وختونو کې ځانګړې اهمیت لري، او موږ باید په ګډه د سیلاب ځپلو وروڼو او خویندو سره مرسته وکړو، ترڅو هغوی وکولی شي بېرته عادي ژوند ته ستانه شي.
په دې حساسو شرایطو کې، افغان سرپرست حکومت اوموږ ټول افغانان چې د مرستې کولو توان لرو باید د خپلو متضررو هیوادوالو سره د مرستې په برخه کې خپل مسئولیتونه په ښه توګه ادا کړو. موږ باید د مرستې لاسونه اوږد کړو او د سیلاب ځپلو خلکو اړتیاوې په عاجل ډول پوره کړو. د ماشومانو د ساتنې ادارې (سيف ده چلډرن) دغه راز په خپله خبرپاڼه کې ویلي، چې په ننګرهار، کونړ او لغمان ولایتونو کې د سیلابونو له امله بې‌کوره شوي ماشومان اوس په سخت حالت کې دي. دوی د کورونو او مالونو له لاسه ورکولو سره مخامخ دي او عاجلو مرستو ته اړتیا لري.
په دې وخت کې نړیوال خیریه سازمانونه کولی شي د مرستو په برخه کې مهمه ونډه ولري. نړیواله ټولنه باید په عاجل ډول د افغانستان سیلاب ځپلو سیمو ته مرستې راولېږي، ترڅو اغېزمن شوې کورنۍ وکولی شي له دې سخت حالت څخه ځان وژغوري. همدارنګه، افغان سوداګر هم باید په دې برخه کې خپله ونډه ترسره کړي. د هېواد سوداګر کولی شي د مالي مرستو، د اړتیا وړ موادو او خدماتو په برابرولو کې مرسته وکړي، ترڅو اغېزمن شوي خلک بېرته عادي ژوند ته راوګرځي.
په دې وخت کې، موږ باید د ملي یووالي په روحيه د خپلو اغېزمنو هیوادوالو سره مرسته وکړو. د سیلابونو له امله بې‌کوره شوي خلک د مرستو په تمه دي، او موږ ټول د دې مسئولیت لرو چې د هغوی لاسنیوی وکړو.
په پای کې، موږ باید د خپلو سیلاب ځپلو هیوادوالو سره په عاجل ډول مرسته وکړو. نړیوال خیریه سازمانونه، افغان سرپرست حکومت ، افغان سوداګر او ټول هیوادوال باید د اغېزمنو خلکو لپاره تر خپلې وسې اړتیاوې پوره کړي. د افغانانو ترمنځ یووالی او همدردي په دې وخت کې ځانګړې اهمیت لري، او موږ .باید په ګډه د خپلو اغېزمنو وروڼو او خویندو سره مرسته وکړو، ترڅو هغوی وکولی شي بېرته عادي ژوند ته را ستانه شي