د افغانستان د ملي امنیت شورا وايي چې تېره اونۍ له تاوتریخوالي ډکه وه چې طالبانو پکې ۴۲۲ بریدونه کړي دي. امنیت شورا وايي چې په دغو بریدونو کې ۲۹۱ امنیتي سرتیري وژل شوي او ۵۵۰ نور ټپیان دي. د ملي امنیت شورا ویاند جاوید فیصل په یوه خبري کنفرانس کې طالبان تورن کړي چې په دغو بریدونو کې یې په یوه اونۍ کې ۴۲ ملکي وګړي وژلي او ۱۰۵ نور یې ټپیان کړي دي. امنیت شورا وايي، له طالبانو د سولې د خبرو له امله د تاوتریخوالي د کمولو تمه وه، خو هغوی برعکس تاوتریخوالی زیات کړی دی. طالبانو په دې اړه څه نه دي ویلي.
دلته څو ټکي د یادونې وړ دي:
لومړی؛ خو تاوتریخوالی او د جګړې دوام د جدي اندېښنې وړ دی. روانې وژنې او جګړه په هېڅ ډول نه توجیه کیږي او بیا په داسې حال کې چې د بین الافغاني خبرو لپاره باید مناسبه فضا او باور رامنځ ته شي، جګړه او بریدونه د سولې ضد حرکت ګڼل کېدلی شي. اوس د سولې او خبرو وخت دی، نو جګړه باید که یو مخ نه درېږي، خو تر وروستي حده باید کمه شي.
دویم؛ د حکومت له خوا خپرېدونکې شمېرې دوه ډوله ستونزې لري. یو خو پکې مبالغه ښکاري او دویم پکې هڅه کېږي چې طالب د سولې ضد او جګړهخوښی ځواک معرفي شي. دا سمه ده چې طالبانو اوږده جګړه کړې ده، خو اوس یې سولې ته له تمایل هم سترګې نه شي پټېدلی. که موږ له ۲۰۱۴ ز کال راهیسي د ملي یووالي حکومت امنیتي پالیسي وګورو، تل هڅه کېده چې د امنیتي ځواکونو مرګ ژوبله پټه شي او د مرګ ژوبلې پر واقعي شمېرو خلک خبر نه شي. اوس که دا شمېرې سمې هم وي، خو همدا چې حکومت یې خپروي، دا خپله د پوښتنې وړ مسئله ده.
درېیم؛ دواړو اړخونو ته د سولې ضد کړۍ او د هغوی نور کورنۍ او بهرني ملاتړي او همفکران هڅه کوي چې د تاوتریخوالي په زیاتولو سره د سولې فضا خرابه کړي او جګړه ییز حالت واکمن کړي. له همدې امله له دواړو اړخونو باید واقعي هڅه دا وي چې دا کړۍ پيدا کړي، مخه یې ونیسي او د سوله ییزې فضا لپاره له خپله اړخه مثبت ګامونه واخلي.
د سولې دښمنان په کمین کې دي او غواړي چې افغانان همداسې ووژل شي، خو موږ باید د سولې لپاره پیاوړي ګامونه واخلو. اوس د تاوتریخوالي او جګړې وخت نه دی. اوس د نرمښت او انعطاف وخت دی. اوس د خبرو او تفاهم وخت دی او پر جګړه ټینګار د سولې په برخه کې شوي ټول پرمختګونه په اوبو لاهو کولی شي. طالبان باید په شدت سره تاوتریخوالی را کم کړي، جګړه ودروي او پرېږدي چې د سولې په برخه کې شوي پرمختګونه لا زیات شي. حکومت هم باید عملي او لفظي دواړه تاوتریخوالي راکم کړي. که ممکنه وي، سره له اوسه باید یو درېیمګړی ځواک وي چې د ښکېلو اړخونو اقدامات وڅاري او تر ممکنه بریده د تاوتریخوالي په کمولو کې هڅې وکړي. اوس جګړه یوازې افغانان وژني، زموږ وروڼه باید نور ونه وژل شي، زموږ خویندي باید کونډې نه شي او نور باید زموږ ورېرونه یتیمان نه شي. له همدې امله پر دې ولس رحم پکار دی او جګړه باید ختمه شي.
