د امریکا ولسمشر ډونالډ ټرمپ په سپینه ماڼۍ کې د یوه خبري کنفرانس پر مهال د داعش ډلې د مشر ابوبکر البغدادي د وژل کېدل خبر تایید کړ.
ټرمپ وویل چې ابوبکر البغدادي د سوریې په شمال لوېدیځ کې د امریکایي ځواکونو په شپنیو عملیاتو کې وژل شوی دی.
هغه زیاته کړې چې البغدادي له څو کلونو راهیسې د امریکا تر څار لاندې و.
ټرمپ دغه راز ویلي چې بغدادي د امریکایي پوځ د عملیاتو پر مهال، په ځان پورې تړلو چاودېدونکو موادو ته چاودنه ورکړې چې څو ماشومان هم ورسره وژل شوي دي.
تر دې وړاندې ناتایید شويو راپورونو هم ویلي وو چې د اسلامي دولت ډلې یا داعش مشر ابوبکر البغدادي، د امریکایي ځواکونو په عملیاتو کې وژل شوی دی.
د نیویارک ټایمز، سي اېن اېن او نیوزویک په ګډون، ځینو امریکایي رسنیو د البغدادي د وژل کېدو په اړه ویلي وو چې ګومان کېږي هغه به د سوریې په ادلیب ولایت کې د امریکایي ځانګړو ځواکونو په عملیاتو کې وژل شوی وي.
په سوریه، عراق او ایران کې ځینو سرچینو د اسلامي دولت یا داعش ډلې د مشر ابوبکر البغدادي د وژل کېدو خبره کړې.
پردې سربېره، یوه امریکایي چارواکي هم د خپل د نوم نه ښودو په شرط رویټرز خبري آژانس ته ویلي وو، چې البغدادي د شنبې په شپه (اکټوبر ۲۶مه) د امریکايي پوځیانو په شپنیو عملیاتو کې په نښه شوی دی.
د سوریې په شمال لوېدیځ ولایت ادلیب کې د یوې سخت دریځې ډلې قوماندان چې نوم یې نه دی په ډاګه شوی، هم ویلي وو چې ګومان کوي البغدادي به د شپې لخوا په هغو عملیاتو کې وژل شوی وي، چې هلیکوپټرو، جنګي الوتکو او ځمکنیو ځواکونو ترکي پولې ته نږدې د بریشا په کلي تر سره کړل.
د البغدادي د وژل کېدو خبر لومړی نیوزویک مجلې ورکړی و.
نیوزویک لیکلي چې یوه امریکایي پوځي چارواکې ورته ویلي چې البغدادي د هغو ځانګړو ځواکونو په عملیاتو کې وژل شوی، چې د نوموړي د اوسېدو د ځای په اړه د تر لاسه شویو کره استخباراتي معلوماتو پر اساس تر سره شول.
د یادونې وړده چې د هغو معلوماتو په بدل کې چې په نتیجه کې یې البغدادي ونیول شي، د امریکا متحده ایالتونو ۲۵ میلیون ډالره جایزه ټاکلې وه.
وروسته له هغې چې په ۲۰۱۷ ز کال کې موصل او رقه ښارونه، چې په عراق او سوریه کې د اسلامي دولت ډلې دوه قوي سنګرونه وو، یادې ډلې له لاسه ورکړل، د البغدادي له لوري اعلان شوی اسلامي خلافت هم ورسره ونړېد او نوموړی دې ته اړشو چې د عراق او سوریې په دښتو کې ځان پټ کړي.
د امریکا په هوایي بریدونو کې د البغدادي مهم قوماندانان ووژل شول او مخکې له دې چې په اپرېل میاشت کې البغدادي ته منصوب یو ویډیویي پیغام خپور شي، د هغه د وژل کېدو په اړه هم ضد و نقیض راپورونه ورکړل شوي وو.
