په هسپانيا کې سراسري اعتصاب او لاريونونه شوي

په هسپانيا کې د نومبر په ۱۱مه نېټه سراسري اعتصاب او لاريونونه شوي، چې په ترڅ کې یې د دغه هېواد په ډېرو ځايونو کې د اعتصاب کوونکو او پوليسو ترمنځ نښتې هم شوې دي.

پولیس وايي، ۵۰ لاريونوال يې نيولي دي. د دغه اعتصاب له امله د هسپانيې په بېلابېلو سیمو کې د تګ راتګ بهیر ګډوډ شوی او ځینې لویې لارې او د ښارونو مهم سړکونه تړل شوي او د اورګاډو پر تګ راتګ یې هم اغېز کړی دی.

د هسپانیې ملي راډیو او ټلوېزیون په یوه راپور کې ويلي، چې د نومبر په ۱۱مه نېټه د دغه هېواد په مادرید، وایادولید، مالاګا او څو نورو سیمو کې د اعتصاب کوونکو او پولیسو ترمنځ اخ و ډب او نښتې شوې دي.

راپور وايي، د هسپانیې پولیسو د همدې ورځې تر ماسپښین پورې، له ۵۰ ډېر کسان د عامه نظم د ګډوډولو او د قانون پلي کولو پر وړاندې د مقاومت او پر پولیسو د برید په شمول د بېلابېلو سرغړونو په تور نیولي دي.