د چين د کمونېست ګوند د ۱۹مې دورې مرکزي کمیټې د شپږمه عمومي غونډه د نومبر په اتمه نېټه په بېجينګ کې پيل شوه او د نومبر تر يوولسمې به دوام ولري. دا په چين کې د اهميت وړغونډه ګڼل کيږي او ګډونوال به يې په عمده توګه د دغه ګوند د تېرو سلو کلونو هڅو پر لويو لاسته راوړنو او تاريخي تجربو خبرې وکړي.
د چين د کمونېست ګوند تاريخي بهير ته په کتو، دغه ګوند د مارکسيزم بنسټيز اصول د چين له مشخصاتو او د زمانې له ځانګړتياوو سره يو ځای کړي او په برياليتوب سره يې د چين ځانګړې سوسياليستې لاره هواره کړې ده.
چين د دغه ګوند د جوړېدو د سلمې کاليزې په درشل کې د بې وزلۍ پر وړاندې بريالۍ مبارزه وکړه، چې له امله يې په دغه هيواد کې ۹۸ ميليونه، ۹ لکه او ۹۰ زره کليوال له بې وزلۍ څخه وتلي او ۸۳۲ ولسواليو له شديدې بې وزلۍ سره مخه ښه کړې ده. د چين د کمونېست ګوند په مشرۍ نوي چين د يو لړ ګامونو په پورته کولو سره نوې زمانې ته داخل شوی او د چيني ملت د بيا سمسورتيا ښه اينده ترې ښکاري.
د چين کمونېست ګوند خپلې هڅې نه دي درولي او د چين د اقتصادي او ټولنيز پرمختګ لپاره يې خپل ورخلاصون نور هم پراخ کړی دی.
شمېرې ښيي، چې د ۲۰۲۱ کال په لومړيو دريو ربعو کې د چين د کورنيو توليداتو عمومي ارزښت ۸۲۳۱۳ ميليارډه او ۱۰۰ ميليونو يوانو ته رسيدلی، چې دغه رقم د تېر کال د همدې مودې په پرتله په سلو کې9.8 زياتوالی ښيي.
په تېرو مسلسلو اوو کلونو کې، د چين د غلودانو کلنۍ توليدي اندازه څه باندې ۶۵۰ ميليارډه کيلو ګرامه ښودل شوې او د دې ترڅنګ د دغه هېواد د کليوالو سيمو د بيا سمسورتيا بهير هم ښه روان دی. د چين په ګوټ ګوټ کې د دغه ګوند څه باندې ۹۵ ميليونه غړي د خلکو د نيکمرغه ژوند لپاره نه ستومانه کېدونکي کوښښونه او سخت کارونه کوي.
د چين کمونېست ګوند سل کلن مزل وهلی، په تېرو سلو کلونو کې ګڼ شمېر ګوندي غړي د هېواد د ازادېدو لپاره قرباني شوي او د دوی د هڅو له کبله چين په نوي ډيموکراتيک انقلاب کې بريالی شوی دی او چيني خصوصيت لرونکې سوسياليستي لاره يې غوره کړې ده.
چين اوس مهال له يو بې وزلي هېواد څخه پر یوه داسې هېواد بدل شوی، چې اقتصادي پيمانه يې۱۰۰ټريليون يوانو ته رسيدلې او د نړۍ دوهم لوی اقتصاد ګرځېدلی دی او چيني ملت هم د هېواد د شتمنېدو او قوي کېدو پر لوري خپلو هڅو ته دوام ورکوي.
د چين د کمونېست ګوند د ۱۹مې مرکزي کميټې شپږمه عمومي غونډه چې اوس په بېجينګ کې روانه ده، د سوسياليستي او عصري هېواد د هر اړخيزې ابادۍ په برخه کې د چين د کمونېست ګوند غړو ته لارښوونه کوي او د چیني ملت د بيا سمسورتيا نوی پړاو به شروع کړي.
بهرنيو خبري رسنيو هم په خپلو راپورتاژونو کې يادې غونډې ته پام اړولی او د چين د کمونېست ګوند پر واکمنې ادارې يې باور څرګند کړی دی. د فليپين ستوري په نوم ورځپاڼې په يوه مقاله کې ليکلي، چې د کرونا وبا له امله د ډېرو هېوادونو پر وړاندې اقتصادي ستونزې شتون لري، خو د چين اقتصاد لا هم پرمختګ کوي.
د روان کال د لومړيو ربعو اقتصادي شمېرې ښيي، چې د چين د کمونېست ګوند په مشرۍ د چين اقتصاد له خوځنده ځواک څخه مالامال دی.
د فليپين پر يادې ورځپاڼې سربېره د سويس، سينګاپور او امريکا په شمول د نورو هېوادونو خبري رسنیو هم دغې غوندې ته پاملرنه کړې ده. دوی باور ښودلی، چې د دغې غونډې په جوړېدو سره به چين د کمونېست ګوند تر مشرۍ لاندې د پرمختګ نوې زمانې ته داخل شي، ځکه په تېرو سلو کلونو کې د چين له سترو بدلونونو څخه بيا ښکاري، چې د چين د کمونېست ګوند رهبري د تاريخ او چينايانو سم انتخاب دی.
