کرونا؛ فرانسې او هسپانیا د نوو او جدي اقداماتو خبر ورکړی دی

په اروپا کې تر ایټالیا وروسته فرانسې او هسپانیا هم د کرونا پر ضد د جدي اقداماتو خبر ورکړی دی. د فرانسې حکومت ویلي چې ډېری غیر ضروري ځایونه لکه هوټلونه، کلپونه، سپورتغالي، کنسرتونه او کنفرانسونه به تړل کېږي او د خلکو پر سفرونو بندیز لګول شوی دی. د فرانسې لومړی وزیر وایي چې کرونا په دغه هېواد کې د خلکو د نه همکارۍ له امله د پراختیا په حال کې ده. په فرانسه کې تر دې دمه د کرونا ۴۴۹۹ مثبتې پېښې ثبت شوې دي او ۹۱ کسه هم ددې ویروس له امله وژل شوي دي. هسپانیې هم په سفرونو بندیز لګولی دی. د خلکو تګ راتګ کم شوی دی او حکومت د جدي اقداماتو خبر ورکوي. کرونا په اروپايي هېوادونو کې عام شوی دی چې جدي اندېښنې یې پارولې دي. د روغتیا نړیوال سازمان پر اروپايي هېوادونو غږ کړی چې ددغه پدیدې د ځپلو لپاره سره یو ځای شي.