د افغانستان ځنګلونه او د ساتنې لپاره د نوې کړنلارې اړتیا

افغانستان یو له هغو هیوادونو څخه دی چې د طبیعي سرچینو په برخه کې خورا بډایه دی، او د ځنګلونو شتمني د هیواد له مهمو ملي سرمایو څخه شمېرل کیږي. افغانستان که څه هم په کلونو جګړو ځپلی او ګڼ شمېر سیمې یې د تاوتریخوالي له امله زیانمنې شوې دي، خو لا هم په بېلابېلو برخو کې پراخه ځنګلونه شته، چې د سیمې د اقلیمي تعادل، هوا د پاکوالي، د خاوري د ساتنې او د اقتصادي ودې په برخه کې مهم رول لري. د هیواد ځنګلونه نه یوازې د خلکو د ورځني ژوندانه لپاره ضروري مواد لکه لرګي، د څارويو لپاره څړ ځایونه او نورې طبیعي سرچینې برابروي، بلکې د چاپېریال د ساتنې او اقلیم د پایښت لپاره هم حیاتي اهمیت لري.
د افغانستان د ځنګلونو ساتنه او بیا رغونه یو له هغو مهمو ملي موخو څخه ده چې افغان سرپرست حکومت باید ورته جدي پاملرنه وکړي. په اوسني وخت کې د ګڼو لاملونو له امله، چې ځینو کې یې د جګړو دوام او د غیر قانوني ځنګل وهلو پراخوالی شامل دي، ځینې سیمې له خپلو طبیعي ځنګلونو بې برخې شوې دي. دا ستونزه نه یوازې د هیواد طبیعي ښکلا او ایکوسیستم ته زیان رسوي، بلکې د افغانستان د ملي اقتصاد او د سیمو په کرنه او حیواناتو هم منفي اغېزې پرېباسي.
اوسمهال، په افغانستان کې د ځنګلونو د ساتنې او د نویو ځنګلونو د جوړولو اړتیا له هر وخت څخه زیاته شوې ده. دا هغه اړتیا ده چې افغان سرپرست حکومت باید ورته ځانګړې پاملرنه وکړي او یوه سمه او عملي کړنلاره رامنځته کړي. د دې لپاره، د ځنګلونو د قطع کولو او له منځه وړلو مخنیوی، د نویو ځنګلونو کینول، او د خلکو پوهاوی او همکاري اړینه ده. په دې برخه کې باید د محلي ټولنو، بزګرانو او د سیمه ییزو ادارو رول هم پیاوړی شي.
افغانستان، که څه هم د اقلیمي او جغرافیوي لحاظه یو وچ او غرنی هیواد دی، خو په بېلابېلو سیمو کې یې د پخو او ځنګلي ځنګلونو د بیا رغونې او ساتنې پراخې سرچینې لري. په دې ترڅ کې د پکتیا،بادغیس،کونړ،نورستان، خوست او نورو سیمو پراخه ځنګلي منابع او هغه سیمې چې لا هم ځینې طبيعي ځنګلونه لري، د ساتنې او بیا رغونې لپاره ځانګړې پاملرنه غواړي. د افغان سرپرست حکومت لپاره مهمه ده چې په دې برخه کې نړیوالې مرستې هم راجلب کړي، ترڅو د ځنګلونو د ساتنې لپاره لازمې سرچینې او ملاتړ ترلاسه کړي.
همدارنګه، د پوهاوي لوړول او عامه شعور رامنځته کول هم ډېر مهم دي. خلک باید وپوهیږي چې ځنګلونه یوازې د لرګیو د ترلاسه کولو سرچینه نه ده، بلکې د هیواد د اوږدمهاله اقتصادي، اقلیمي او چاپېریالي پرمختګ یوه مهمه برخه ده. د همدې لپاره، د خلکو او حکومت ترمنځ همکاري او ګډې هڅې ضروري دي.
په پای کې، د افغانستان ځنګلونه د هیواد له ملي سرمایو څخه دي او د دې سترې سرمایې ساتنه او پالنه د افغان سرپرست حکومت مهمه دنده ده. د نوې کړنلارې جوړول، د خلکو د پوهاوي زیاتول، او د ځنګلونو د غیر قانوني وهلو مخنیوی هغه اقدامات دي چې باید ژر تر ژره عملي شي، ترڅو د افغانستان ځنګلونه، چې د چاپېریال او اقتصاد لپاره حیاتي دي، له منځه ولاړ نه شي.