هېواد کې د ټاپي پروژې د مسیر جوړونې کار ۸۷ کیلومتره پرمخ تللی

د امارتي شرکتونو رییس احمدجان بلال ویلي، چې د ټاپي پروژې د ۱۵۳ کیلومتره مسیر څخه، تر هرات ښار پورې د ۸۷ کیلومتره برخې د چمتو کولو چارې بشپړې شوې دي. بلال ویلي، تر هراته د پروژې رسېدو وروسته به په لومړي پړاو کې د افغان ګازو وېش صنعتي پارکونو او برېښنايي پروژو ته پیل شي او وروسته به عامو خلکو ته هم ورسېږي. د افغانستان برېښنا شرکت مسوولین وایي، له ترکمنستان سره د ګازو د بیې پر وروستي کېدو خبرې روانې دي او تر هغې وروسته به د ګاز سټېشنونو او برېښنا تولید لپاره چمتووالی ونیول شي. مسوولین ټاپي پروژه د هېواد د ځان بسیاینې او د ټرانزیتي موقعیت د پیاوړتیا لپاره مهمه بولي او ټینګار کوي چې د افغانستان اړونده برخه به ژر تر ژره بشپړه شي.