په چین کې د پسرلني اختر په درشل کې د خلکو د تګ راتګ څپه له اختره ۱۵ ورځې مخکې پيل کېږي او تر ۲۵مې ورځې پورې يې دوام مومي، چې ټولټال ۴۰ ورځې کېږي.
هغه کسان چې له کوره بهر په نورو ځایونو کې کارونه یا زده کړې کوي، په پسرلني اختر کې خپلو مېنو ته ځي او تر اختر وروسته بېرته خپلو دندو، کارونو او زده کړو ته ستنېږي، نو په همدې مناسبت په چين کې هر کال د پسرلني اختر په درشل کې د تګ راتګ لويه څپه روانه وي.
د ۲۰۲۶م کال د پسرلني اختر د ټرانسپورټ څپه د فبرورۍ په ۲مې نېټې پیل شوې ده.
رسمي وړاندوینې ښيي، په چين کې به خلک د سږني پسرلني اختر په درشل کې ۹ اعشاریه ۵ ميلیارډه ځلې سفرونه وکړي او یو نوی تاریخي ریکارډ به جوړ کړي.
د چين د ټرانسپورټ بېلا بېلې ادارې او شرکتونه د پسرلني اختر په درشل کې د مسافرو لپاره خدمتونه کوي.
د چین ریل پټلۍ ادارې د روان کال د پسرلني اختر په موده کې د اورګاډو نوی مهالویش اعلان کړی دی.
تمه ده، د سږني پسرلني اختر په درشل کې به د مسافرو شمېر ډېر زیات وي او د اورګاډیو ورځنی شمېر به له ۱۴ زرو څخه پورته وي او هره ورځ به ۱۹ زره او ۴۰۰ الوتکې الوتنې ولري، چې دغه شمېر د تېر کال د همدې مودې په پرتله ۵ سلنه زیاتوالی ښيي. په ورته وخت کې، ځمکنی او سمندري ټرانسپورټ به هم خپل ټرانسپورټي توان لوړ کړي او خلکو ته به د سفر ښې اسانتياوې برابرې کړي.
ټېکنالوژیکي پرمختګونه به د روان کال د پسرلني اختر په موده کې د ټرانسپورټي ستونزو د کمولو لپاره کلیدي رول ولوبوي.
د چين ځيرکو سیسټمونو خلکو ته د سفر ډېرې اسانتیاوې برابرې کړې دي او د دې هېواد خلک اوس د ګرځنده اپ له لارې ټیکټونه اخلي.
د دې تر څنګ، په چین کې په زیات شمېر د ورو سرعت اورګاډي هم کارول کېږي. د دغو اورګاډيو د ټیکټونو بیې ټيټې دي، بې شمېره کلي يې له بهرنۍ نړۍ سره نښلولي او د ځایي اوسېدونکو د سفر اړتیاوې يې پوره کړې دي. د کليوالو سیمو ډېری خلک بازارونو او لرو سیمو ته اوس هم په همدغو اورګاډو کې سفرونه کوي.
د پسرلي اختر ټرانسپورټي څپه د چینایي ټولنې د نندارې کړکۍ بلل کېږي.
مونږ ګورو، د چين حکومت د خپلو خلکو لپاره په پوره اخلاص، پوهې او سرچېنې کاروي او د ميليونونو کورنيو د خوبونو او ارمانونو د پوره کولو لپاره هلې ځلې کوي.
د چین د پسرلني اختر په موده کې د خلکو د ۹ اعشاریه ۵ ملیارډو ځلو سفرونو منزل د هغوی خپلې مېنې دي او دا د چين د هغې مفکورې ښکارندويي کوي، چې له مخې يې د هېواد پرمختيا د خلکو په مرکزيت ترلاسه کېږي.
