د چين دولت رئيس شي جين پينګ د پسرلني اختر د رارسېدو په درشل کې په پلازمېنې بېجينګ کې د رېښيزو رتبو له کادرونو او ځايي خلکو سره لیدلي او د دوی د حال احوال پوښتنه یې کړې ده.
نوموړي د پسرلني اختر په مناسبت د هېواد د بېلا بېلو قومونو خلکو، د هانکانګ، مکاو او تايوان وطنوالو او په بهر کې مېشتو چينايانو ته د پسرلني اختر مبارکي او نيکې هيلې وړاندې کړې دي.
رئيس شي جين پينګ د فبرورۍ له ۹مې څخه تر ۱۰مې نېټې پورې په بېجينګ کې د ټېکنالوژۍ له نوښت زون، د زړو خلکو له خدمتي استوګنځي او د پسرلني اختر له يوه بازار څخه ليدنه کړې او ځايي کادرونو او خلکو ته يې د پسرلنې اختر مبارکي ويلې ده.
نوموړی د ۹مې نېټې په سهار د بېجينګ يي جوانګ سيمې ته تللی او هلته یې د مخابراتي تخنيکونو د نوښت لاسته راوړنې له نږدې مشاهده کړي او له څېړونکو او مسئولينو سره يې خبرې کړې دي.
شي جين پينګ د همدې مياشتې د ۱۰مې نېټې په سهار د بېجينګ ښار د شي چنګ سيمې د زړو خلکو له يوه خدمتي استوګنځي څخه هم لیدنه کړې او په خوړنځي کې زړو کسانو ته د خوړو د خدمت په اړه يې معلومات ترلاسه کړي دي.
شي جین پينګ له خوړنځي څخه د لیدنې په ترڅ کې د چټک پوست څو ليږدونکي، چې هلته يې دمه او استراحت کاوه، ليدلي دي. شي جين پينګ له هغوی څخه د کار او ژوند د حال احوال پوښتنه کړې او د دوی زحمتونه او خدمتونه يې ستايلي دي.
