د ملګرو ملتونو امنیت شورا د ډسمبر په ۱۲مې نېټې ۲۸۱۶م پرېکړه ليک تصویب کړی او ( پر طالبانو د بنديزونو په اړه) د ۱۹۸۸م پرېکړه ليک کمېټې د څار ډلې واک یې يو کال نور هم غځولی دی.
په ملګرو ملتونو کې د چين دايمي استازي فو څونګ د دې پرېکړه لیک له تصویب وروسته په توضيحي وينا کې ويلي، چې د ۱۹۸۸م پرېکړه ليک د بندیزونو میکانیزم ډېری احکامو لا تراوسه د افغانستان په وضعیت کې ژور بدلونونه نه دي منعکس کړي.
چین له امنیت شورا څخه غوښتي، چې يادې مسئلې ته پاملرنه وکړي او د ۱۹۸۸م پرېکړه ليک د بندیزونو میکانیزم په اړه بياکتنه او سيسټماټيک او د پراخ لرلید لرونکی تعدیل ترسره کړي، څو دغه ميکانيزم د اوسني وضعیت اړتیاوو ته په کتو ښه تطبیق شي.
فو څونګ زياته کړې، د ملګرو ملتونو د څار ډله باید یو هدفمند او بې طرفه دریځ وساتي، خپل مسلکي تخصص باید وکاروي او د ۱۹۸۸م پرېکړه ليک کمېټې د کار لپاره باید قوي ملاتړ برابر کړي. د دې ترڅنګ، دغه کمېټه باید د امنیت شورا د دايمي غړو او نورو غړو د نظرونو اورېدلو ته هم په درنه سترګه وګوري او د شانګهای همکارۍ سازمان او د ډله ایز امنیت تړون سازمان په څېر مهمو سیمه یېزو سازمانونو سره باید پياوړې اړیکې او تبادلې ولري.
نوموړي ويلي، طالبان له څلورو کلونو راهیسې پر افغانستان واکمن دي، مګر د ۱۹۸۸م پرېکړه ليک د بندیزونو میکانیزم ډېری احکامو لا تراوسه د افغانستان په وضعیت کې ژور بدلونونه نه دي منعکس کړي. د لومړي ګام په توګه، د افغان حکومتي پرسونل په اړه د سفر بندیز جامع معافیتونه باید ژر تر ژره بېرته بحال شي، څو له نړيوالې ټولنې سره د دوی تماس او تبادلې اسانې شي.
