د چين د کمونېست ګوند د مرکزي کمېټې د سياسي بيورو غړي او د بهرنيو چارو وزير وانګ يي د فبرورۍ په ۱۳مه نېټه د مونيخ د امنيتي کنفرانس په ترڅ کې له خپل امريکايي سيال مارکو روبیو سره وکتل.
وانګ يي وويل، د چين دولت رئيس شي جين پينګ او د امريکا ولسمشر ډونالډ ټرمپ د دواړو هېوادونو ترمنځ د اړيکو د پرمختګ لپاره ستراتيژيکه لارښوونه کړې ده. د دواړو هېوادونو د مشرانو له خوا تر لاسه شوې مهمې موافقې باید په ښه توګه پلي شي، څو ۲۰۲۶ کال د چين او امريکا لپاره د متقابل درناوي، سوله ييز ګډ ژوند او همکارۍ یو کال وګرځي.
هغه وويل: (( د چين او امريکا ترمنځ خبرې تر تقابل، همکارۍ يې تر شخړې او ګډې ګټې يې تر صفر جمع لوبې غوره دي. که دواړه هېوادونه د برابرۍ، درناوي او متقابلو ګټو اصول رعایت کړي، نو دواړه خواوې به وکولای شي چې اندېښنو ته د حل لارې ومومي او اختلافات په سمه توګه اداره کړي. دواړه خواوې بايد په ګډه هڅه وکړي، څو همکاري پراخه کړي او ستونزې کمې کړي او خپلمنځي اړيکې د ثابتې، سالمې او دوامدارې ودې پر لور روانې شي او نړۍ ته لا ډېر مثبت پيغام ورکړي.))
دواړو لوريو دغه ليدنه مثبته او رغنده وبلله. هغوی هوکړه وکړه چې د دواړو هېوادونو د مشرانو ترمنځ شوې مهمې موافقې به عملي کړي، د سياسي او ديپلوماتيکو لارو د همغږۍ رول به پياوړی کړي، د لوړپوړو تعاملاتو لپاره به ښه خدمتونه وکړي، د بېلابېلو برخو خبرې اترې او همکارۍ به پراخې کړي او خپلمنځي اړيکو ته به ثابت پرمختګ ورکړي.
