پسرلنی اختر په چين کې تر ټولو لوی او مهم اختر دی، چې په وياړ يې په دغه هېواد کې ۷ ورځې رخصتي وي، خو سږ کال يې په وياړ ۹ ورځې رخصتي وه.
چينايان د پسرلني اختر د را رسېدو په درشل کې د دغه اختر لپاره د نمانځنې توکي اخلي او يوه او بله خوا سفرونه کوي، چې په رڼا کې يې په دغه هېواد کې بازار سمسور او ګرم وي.
بهرني شرکتونه هم په دغه اختر کې خپل فعالیتونه ترسره کوي او د چين له لوی بازار څخه ګټه پورته کوي او ځای ځایګی پکې مومي.
د نېستلي شرکت د چيني څانګې مشر ما کای سه له سي اېم جي سره په مرکه کې ويلي، چې په پسرلني اختر کې مصرف ډېر زیات وي او شرکت يې هڅې کوي، چې د پسرلني اختر له را رسېدو وړاندې نوښتونه زيات او د مشتريانو اړتیاوې پوره کړي.
د چين د سوداګرۍ وزارت په شمول ۹ وزارتونو په ګډه د سږني پسرلني اختر په درشل کې د ۲۰۲۶م کال د پسرلني اختر د مصرف ځانګړی فعاليت ترسره کړی او يو لړ پاليسۍ يې خپرې کړې دي، څو مشتريان او بهرنيان د پسرلني اختر خوشحاله فضا احساس کړي، ګټې ترلاسه کړي او هم د چين د بازار پټ توان را وپاروي.
ياد فعالیت د چين مصرف بازار ته خوځنده ځواک ورکړی او نړیوالو هم ترې ګټه پورته کړې او له چينايانو سره يې په ګډه د دې اختر خوشحاله فضا احساس کړې ده.
شمېرې ښيي، د پسرلني اختر په درشل کې چين ته د هوايي پروازونو د ټيکټونو شمېر د تېر کال د همدې مودې په پرتله ۴۰۰ سلنه زيات شوی دی.
بهرنيو شرکتونو له ياد فعاليت څخه ګټه پورته کړې ده.
د اوکسفورډ پوهنتون د چيني چارو څېړنيز مرکز کارپوه جيورج ماګنوس رسنيو ته ويلي، چې پسرلني اختر په چين کې مصرفي بازار ډېر ګرم او سمسور کړی دی.
چین په دې وروستيو کلونو کې د ورخلاصون تګلاره ساتلې او ګمرکي تعرفې يې ټيټې کړې دي، چې په رڼا کې يې د بېلا بېلو هېوادونو غوره تولیدات دغه هېواد ته صادرېږي او هم چين نړۍ ته خپل تولیدات لېږي او خدمتونه ورته برابروي.
د جې ډي لوجيستيکس د اروپايي چارو مسئول له سي ايم جي سره په مرکه کې ويلي، چې شرکت يې د سږني پسرلني اختر تر رارسېدو مخکې په يو شمېر اروپايي هېوادونو کې د چټک پوسټ جوي ايکسپرېس برانډ خپور کړی دی. جوي ايکسپرېس اوس د بريتانیا، جرمني، هالنډ او فرانسې په عمده ښارونو کې په يوې او دوو ورځو کې مشتريانو ته توکي لېږدوي.
د هسپانيې د راډيو او ټلويزيون شرکت پر خپلې وېبپاڼې يوه لیکنه کې ويلي، چې اوسمهال د نړيوال اقتصاد پرمختګ ورو دی او هم له بې ثباتۍ سره مخ دی. نو په داسې حال کې د چين پسرلنی اختر نه يوازې نړیوال مصرف پياوړی کوي، بلکې نړيوالې سوداګرۍ او خدمتي صنعت ته هم وده ورکوي، چې په دې سره نړیوال اقتصاد پياوړی کېږي.
اوسمهال د بېلا بېلو هېوادونو سيلانيان چین ته سفرونه کوي، تولیدات يې اخلي او یو له بل سره خوشحالۍ شريکوي.
