د چين د پسرلني اختر په بهیر کې د دغه هېواد د بېلا بېلو ښارونو په سوداګيزو سيمو کې د خلکو ګڼه ګوڼه زياته شوې او سوداګریزو بازارونو يې ډېر مشتريان راجلب کړي دي.
شنونکي وايي، د چین د مصرف پټ توان په پراخېدو دی او د پسرلني اختر په موده کې يې د لګښتونو پر له پسې زیاتوالي نړیوال اقتصاد ته حیاتي ځواک برابر کړی دی.
بهرني تولیدات په چیني بازار کې ښه پلورل کېږي.
د پسرلني اختر په موده کې د چين په بازارونو کې د متحده عربي اماراتو د چاکلیټو او د فرانسې د کاسمیټکس يا سیمسارۍ په شمول د بهرنیو هېوادونو د تولیداتو د خرڅلاو اندازې زياتې شوي.
اوسمهال د چین مصرف کونکي د زرغونتيا او روغتیا مصرفي مفکورې غوره بولي. دغه راز بهرنيو شرکتونو د پسرلني اختر له فرصت څخه په استفادې چيني مشتريانو ته نوي محصولات وړاندې کړي او خدمتونه يې لوړ کړي دي.
بهرني شرکتونه د چین د پسرلني اختر د توکو په میلو کې هم سیالي کوي. روان کال د بېجینګ فانګ په سوداګریزه سیمه کې په لومړي ځل د غیر مادي کلتوري میراثونو د توکو د پلور فعالیت ترسره شو، چې پکې د ۱۴ هېوادونو او سیمو شرکتونو هم د خوړو او کاسمیټکس په شمول ډول ډول تولیدات نندارې ته وړاندې کړي وو.
د بېجینګ اوسېدونکې میرمن لي وايي، اوس په چين کې د نړۍ تازه خوراکونه او ډول ډول تولیدات پيدا کېږي او هر کس یې په اسانۍ موندلی شي.
د چین د کډوالو ملي ادارې په يوې وړاندوینې کې ويلي، چې د روان کال د پسرلني اختر د رخصتۍ په جریان کې به هره ورځ د دغه هېواد د بندرونو له لارې ۲ ميليونه او ۵۰ زره کسان تګ راتګ وکړي، چې دا شمېر د تېر کال د همدې مودې په پرتله ۱۴ اعشاریه ۱ سلنه زیاتوالی ښيي.
د چین د پسرلني اختر اغېزه کال په کال لوړېږې او په بهیر کې يې د سفر اسانتیاوې هم زياتېږي. په چین کې د پسرلني اختر لمانځل یو نوی نړیوال فیشن ګرځېدلی دی.
د اذربایجان يوه سیلاني ایلګار علییف په دې وروستیو کې له خپلې مېرمنې سره د چین ون جو ښار ته سفر کړی او هلته یې له خپل زوی سره، چې په ون جو پوهنتون کې زده کړې کوي، هم لیدلي دي.
علییف رسنيو ته ویلي، چې پسرلنی اختر د چین د کورنیو غړو د یوځای کېدو او خوښۍ غوره وخت دی او بهرني سیلانيان کولی شي چې په همدې وخت کې د چيني ملت له کولتور او دودونو سره ښه اشنا شي.
انلاین شمېرې ښیي، د ۲۰۲۶م کال د پسرلني اختر د رخصتۍ په جریان کې د فلمونو د ټکټونو ازرښت له ۵ ميلیارډو یوانو څخه پورته شوی دی.
د لیسوتو ملي پوهنتون د اقتصاد پوهنځي مدیر لیسیکو مکیتا پر دې اند دی، چې د پسرلني اختر په بهیر کې د چین فعال مصرفي بازار د کورنيو اړتياوو لوړوالی او د خدمتي چارو ګړنديتوب او د ډیجیټل مصرف مثبتې نښې منعکسوي. دا د دې څرګندويي کوي، چې د چین د مصرف پټ توان په دوامداره توګه را ښکاره کېږي.
هسپانوي نشراتي شرکت پر خپلې وېبپاڼې يوې ليکنې کې ويلي، د پسرلني اختر په موده کې د چین مصرفي بازار د بهرنۍ سوداګرۍ او د خدمتي چارو د پرمختګ لپاره ګټور دی او نړیوال اقتصادي پرمختګ په خوځښت راوستلی شي.
پسرلنی اختر یوازې دودیز اختر نه دی، بلکې دا د نړیوال اقتصاد لپاره د ژوند سرچینه هم ګرځېدلې ده.
