چین په ۲۰۲۱م کال کې د بېوزلۍ پر وړاندې مبارزه کې بریا اعلان کړه او پنځه کلنه انتقالي دوره يې اعلان کړه. په دې پنځه کلنه دوره کې د دغه هېواد ټولو ۸۳۲ ولسوالیو، چې له بېوزلۍ څخه ایستل شوې دي، مخکښ صنعتونه پاللي او له بېوزلۍ څخه د وتلو بنسټ يې نور هم ټينګ شوی دی.
د چین ميډيا ګروپ د سي جي ټي اېن(CGTN) د نظرپوښتنې ۹۳.۵٪ ګډونوالو د بېوزلۍ پر وړاندې د چين د مبارزې بريا په نړۍ کې د بېوزلۍ د کمولو لپاره مهم خدمت بللی دی.
د نظرپوښتنې ۸۹.۵٪ ګډونوال پر دې باور دي، چې د چین د بېوزلۍ د له منځه وړلو بریا نه یوازې د مادي بېوزلۍ ستونزه حل کړې، بلکې د خلکو د ذهن او سوچ، د ژوند طرز او بنسټيزې حکومتولۍ په شمول ډېرو نورو برخو کې هم د پرمختګونو سبب شوې ده.
د نظرپوښتنې ۹۲.۹ ٪ ګډونوال بیا پر دې باور دي، ” خلک محوره پرمختيايي مفکوره” چې چين يې پر عملي کولو ټينګار لري، د بېوزلۍ د کمولو لپاره اصلي خوځنده ځواک جوړوي.
د نظرپوښتنې ۸۵.۸ ٪ ګډونوال د بېوزلۍ کمول اصلاً د پراختیا مسئله بولي او په نظر يې، پرمختګ د بېوزلۍ د له منځه وړلو ترټولو اغېزمنه لاره ده.
د نظرپوښتنې ۹۰.۵ ٪ ګډونوال بیا پر دې اند دي، چې چین د یوه منظم سازماني سیسټم او اغیزمن عملیاتي میکانیزم په جوړولو سره د بېلا بېلو خواوو وړتياوې راټولې کړي او د بېوزلۍ پر وړاندې مبارزې ته يې هڅولې دي، چې همدا د دې مبارزې د بريا مهم لامل دی.
دغه نظرپوښتنه د سي جي ټي اېن په انګليسي، هسپانوي، فرانسوي، عربي او روسي ژبو په پلېټ فورمونو کې خپره شوې او په ۲۴ ساعتونو کې ۹۷۴۴ انټرنېټ کاروونکو پکې ګډون کړی او خپل نظرونه يې څرګند کړي دي.
