یونیسف: جاپان له افغانستان سره ۴.۴ میلیون ډالره نوې مرسته اعلان کړه

د ملګرو ملتونو د ماشومانو د ملاتړ صندوق( یو نیسف) خبر ورکړی، چې د جاپان حکومت له اغېزمنو شویو افغانانو سره د مرستې لپاره ۴.۴ میلیونه امریکايي ډالر اضافي مرسته اعلان کړې ده. ټاکل شوې ده چې د دې مرستې له لارې به یونیسف له ۶۰ زرو څخه زیاتو کسانو ته، چې تر نیمایي ډېر یې ماشومان دي، د پاکو اوبو، روغتیايي خدمتونو او د ماشومانو د ساتنې اړین خدمات برابر کړي. دا په داسې حال کې ده چې په ۲۰۲۵ کال کې له ایران او پاکستان څخه څه باندې ۲.۸ میلیونه کسان افغانستان ته راستانه شوي، چې شاوخوا ۶۰ سلنه یې ښځې او ماشومان دي. د وروستیو ارزونو له مخې، ۶۷ سلنه کورنیو د وچکالۍ او د اوبو د کمښت ستونزه راپور کړې او ۲۵ سلنه کورنۍ لا هم له غیر معیاري اوبو څخه استفاده کوي. همداراز، په ځینو سیمو کې د شدیدې نس ناستې پېښې زیاتې شوې دي، چې د ناروغیو د خپرېدو خطر یې لوړ کړی دی.