د جرمني د فدرالي جمهوریت صدراعظم فریدریش میرز د ۲۰۲۶م کال د فبرورۍ په ۲۵مې نېټې چین ته په رسمي سفر تللی دی.
نوموړي په بېجینګ کې د چين له دولت رئیس شي جین پيګ سره لیدلي او د دغه هېواد له صدراعظم لي چيانګ سره یې د دواړو هېوادونو پر اړيکو خبرې کړي او د نړيوالو او سیمه يېزو مسئلو او اقتصادي تګلارو په اړه يې ورسره نظرونه تبادله کړي دي.
فریدریش ميرز د چین د ولسي جمهوریت د صدراعظم لي چیانګ په بلنه دغه هېواد ته تللی او په مل لوړپوړي پلاوي کې ورسره د جرمني د اقتصادي برخې ۳۰ استازي هم شامل دي.
د جرمني او چين سیالانو د هراړخیز ستراتیژیک مشارکت په چوکاټ کې د خپلمنځي سالمو همکاريو ستاينه کړې او متقابل درناوی، ګډې ګټې، دوامدارې پرانیستې خبرې او د ګډو ننګونو پر وړاندې همکارۍ يې د خپلمنځي اړيکو د پراختیا لپاره بنسټیز اصول بللي دي.
دواړو خواوو څرګنده کړې، چې چين ته د میرز سفر د دواړو هېوادونو د ملګرتیا پراختیا ته نوی خوځنده ځواک ورکړی او د خپلمنځي همکاريو لپاره يې د بین الحکومتي مشورتي میکانیزم پر لارښوونکي رول ټینګار کړی دی.
جرمني لوري د یو چین پېژندنې اصل ته خپله ژمنتیا بيا څرګنده کړې ده.
دواړو خواوو اقتصادي او سوداګریزې همکارۍ د دوه اړخیزو اړیکو مهمه برخه بللې او موافقه يې کړې، چې خپلمنځي ګټې – ګټې همکارۍ به نورې هم ژورې کړي.
دواړو خواوو ويلي، هېوادونه به یې د ملګرو ملتونو د منشور او نړیوال قانون د اصولو پر بنسټ پر نړیوالو مسئلو خبرو ته دوام ورکړي، د ملګرو ملتونو حیثیت به ټينګ وساتي او څو اړخیزم او ازادې سوداګرۍ ته به غاړه کېږدي.
