((هيله ده چې مونږ په اس کال کې مخکښ او د ښامار او اس په څېر فعال او پياوړي واوسو. هيله ده روان کال د جرمني او چین د همکاريو او پرمختګ کال وګرځي.))
د جرمني صدراعظم فریدریش میرز د روانې مياشتې په ۲۶مې نېټې د بېجینګ له امپراتورۍ ماڼۍ څخه تر لیدنې وروسته پر ټولنيزو رسنيو په چيني ژبه يادې جملې ليکلې دي.
نوموړی د فرانسې، ایرلینډ، فنلنډ او برېتانيې له مشرانو وروسته د اروپا پنځم مشر دی، چې په درېیو میاشتو کې له چین څخه لیدنه کوي. فریدریش میرز د دې سفر په جريان کې له پلازمېنې بېجينګ او هانګجو څخه ليدنه کړې ده.
د جرمني حکومت پر خپلې وېبپاڼې د نوموړي د سفر د ټول بهیر راپورونه خپاره کړي او په تبصرو کې يې لیکلي، چې دغه سفر به د چين او جرمني ستراتېژيک مشارکت ژور کړي او دوه اړخيزې همکارۍ به يې د لا ښکلي راتلونکي پر لور حرکت وکړي.
له میرز سره مل جرمني متشبثینو چیني بازار د خپلو ګټو او نوښت لپاره مهم بللی او اراده يې ښودلې چې په دغه هېواد کې به زیاتې پانګونې وکړي.
دا د جرمني د صدراعظم په توګه د میرز د ماموريت له پيل وروسته چين ته د نوموړي لومړی سفر دی او دغه راز هغه لومړی بهرنی مشر هم دی، چې په کرنيز اس کال کې يې دغه هېواد ته سفر کړی دی.
د چين دولت رئیس شي جين پينګ له فریدریش ميرز سره د لیدنې پر مهال ويلي، چې چين او جرمني دې د باور وړ همکاران واوسي، يو د بل ملاتړ دې وکړي او د ورخلاصون او متقابلو ګټو پر اساس دې نوښتګر همکاران واوسي او دغه راز کلتوري همکاران دې واوسي او يو او بل دې درک او درناوی دې وکړي.
د نوموړي دغو څرګندونو د دواړو هېوادونو د هراړخیز ستراتېژيک مشارکت د نوي پرمختګ لپاره لوری روښانه کړی دی.
دواړو هېوادونو د زرغون بدلون، ګمرک، سپورټ او میډيا په شمول ځينو برخو کې د همکاریو تړونونه لاسليک کړي او ګډه اعلاميه يې خپره کړې ده.
میرز ويلي، هېواد يې له چين سره اړيکو ته ارزښت ورکوي او ژورې همکارۍ ورسره غواړي او په خبره یې، دواړه هېوادونه دې متقابلې ګټې وپالي او ګډه وده دې ومومي.
نړيوال وضعيت له دويمې نړيوالې جګړې راهیسې د ډېر ژور بدلون په حال کې دی.
نړيوال وضعيت که څومره پېچلي کېږي، د چين او جرمني لپاره به خپلمنځي ستراتېژيکې خبرې اړينې وي او باور به پياوړی کوي او د متقابل ملاتړ پر اساس به همکارۍ کوي.
په تېرو څو کلونو کې د جرمني دننه داسې نظرونه خپاره شوي، چې ګواکې چين يو لوی خطر دی او له منځه وړل يې غواړي.
میرز چين ته له سفر وړاندې رسنيو ته ويلي، چې چين د نړۍ مهم ځواک دی او د نړيوالو مسئلو حل د دغه هېواد ونډې ته اړتيا لري.
نوموړي له چين سره د اړيکو پرېکون ناسم بللی او په وينا يې، که کوم هېواد داسې کوي، نو ځان ته به زیانونه ورسوي. د هغه دغه څرګندونې د چين په اړه د جرمني د تګلارو د منطقي او عملي کېدو ښکارندويي کوي.
فريدریش مېرز ويلي، چين او جرمني دې د پرانيستو او متقابلو ګټو پر اساس نوښتګر همکاران وګرځي، د سياليو او همکاريو اړيکې دې ښې مدیريت کړي او د همکاريو لپاره دې پرله پسې نوی خوځنده ځواک وپالي.
د چین او جرمني اوسنۍ کلنۍ سوداګري له ۲۰۰ ميلیارډو ډالرو څخه پورته شوې او دوه اړخیزه پانګونه يې له ۶۵ ميلیارډو ډالرو څخه زیاته شوې ده، چې دا دواړه شمېرې د چین او اروپايي ټولنې ترمنځ د سوداګرۍ په حجم کې نږدې يوه پر څلورمه جوړوي.
جرمني په ۲۰۲۵م کال کې د چين لومړی لوی اروپايي سوداګريز همکار پاتې شوی او چين له يو کلن ځنډ وروسته بيا د جرمني تر ټولو لوی سوداګريز همکار ګرځېدلی دی.
فریدریش ميرز سره په پلاوي کې ۳۰ اقتصادي استازي هم مل وو، چې دا د دوه اړخيزو اقتصادي او سوداګریزو اړيکو ژورتيا ته د جرمني د لېوالتيا ښکارندويي کوي.
نوښت او عصري ټېکنالوژي به د چين او جرمني ترمنځ د همکاريو نوې لاسته راوړنې وګرځي.
شي جين پينګ ويلي، د جرمني د ټېکنالوژۍ، نوښت او ډيجيټلي چارو نوې پرمختيايي ستراتېژي د چين د ځيرکتيا، زرغون او مدغم پرمختګ له هغې موخې سره ورته والی لري، چې د خپل ۱۵م پنځه کلن پلان لپاره يې ټاکلي دي.
نوموړي ويلي، دواړه هېوادونه دې پرمختيايي ستراتېژۍ سره وصل کړي، د مستعدو کسانو، پوهې او ټېکنالوژۍ له تګ راتګ يا تبادلې څخه دې ملاتړ وکړي او د مصنوعي ځيرکتيا په برخه کې دې ډيالوګ او همکارۍ پياوړې کړي.
چين او جرمني ژوره کلتوري مخينه لري، د شي جین پينګ هغه وړانديز، چې دواړه هېوادونه دې په کلتوري او هنري لحاظ يو او بل درک او نږدې همکاران وګرځي، د خلکو له هيلو سره سمون لري.
تراوسه د دواړو هېوادونو تر سلو زياتو ولایتونو او ښارونو ځانګړې دوستانه اړيکې ټينګې کړې دي.
میرز په چيني ژبه پر خپلې ټولنیزې پاڼې د دواړو هېوادونو خلکو ته نيکې هيلې وړاندې کړي او د بېجینګ امپراتورۍ ماڼۍ څخه يې سېل کړی دی، چې دا له چيني کلتور سره د نوموړي د علاقې ښکارندويي کوي.
د چين او جرمني د ګډې خبري اعلاميې له مخې، دواړه هېوادونه به په کلتوري او سپورټي برخو کې همکارۍ تقويه کړي او پر همدې لارې به د خپلو خلکو ملاتړ ترلاسه کړي.
دواړو لوريو په ګډې اعلاميې کې د ملګرو ملتونو منشور او نړيوال قانون د نړيوالو همکاريو بنسټ بللی دی او دا د دې څرګندويي کوي، چې دوی د ملګرو ملتونو مرکزي رول ساتي.
بېجينګ ته د میرز سفر په نوي کال کې د چين او جرمني د همکارۍ لپاره ښه پېلامه جوړوي. تمه ده جرمني خنډونه لرې او د چين په اړه منطقي او عملي تګلارې پلې کړي او ورسره اړيکو ته یې خوځنده ځواک ورکړي او د چين او اروپا د اړيکو او د نړۍ د ثبات لپاره ښه رول ولوبوي.
