د چین د کمونیست ګوند د مرکزي کمیټې د سیاسي بیورو غړي او بهرنیو چارو وزیر وانګ يي د مارچ په لومړۍ نېټې د روسیې له بهرنیو چارو وزیر سيرګي لاوروف سره ټلیفوني خبرې کړې دي.
د ملګرو ملتونو امنیت شورا تېره ورځ د چین او روسیې په غوښتنه د ایران د اوسني وضعیت په اړه بیړنۍ غونډه ترسره کړې ده.
وانګ يي له روسي سیال سره يادې غونډې ته په اشارې ویلي، چین د ملګرو ملتونو د منشور د موخو او اصولو د اطاعت ملاتړ کوي او په نړیوالو اړیکو کې له زور کارولو سره ټينګ مخالفت کوي.
نوموړي ويلي، د امریکا او ایران د خبرو اترو په ترڅ کې د امریکا او اسراییلو لخوا د ایران پر وړاندې پیل شوي بریدونه د منلو وړ نه دي او په دې اړه یې ژوره اندېښنه څرګنده کړې ده.
وانګ يي له سيرګي لاوروف سره په خبرو کې د چين دريځ څرګند کړی دی: لومړی، امريکا او روسيه باید پوځي عملیات سمدستي ودروي. دوهم، ښکېلې خواوې باید ژر تر ژره خبرو ته راوګرځي. درېیم، هېواد يې له یو اړخیزو اقداماتو سره ټينګ مخالفت کوي.
لاوروف ویلي، د ایران پر وړاندې د امریکا او اسراییلو پوځي بریدونو د منځني ختیځ ثبات سخت زیانمن کړی او په خبره یې، د روسیې دریځ د چین له دریځ سره یو شان دی.
هغه ويلي، روسیه به له چین سره همغږي پیاوړې کړي او د ملګرو ملتونو او شانګهای همکارۍ سازمان له لارې د جګړې د سمدستي بندولو او د ډیپلوماټیکو خبرو اترو پروسې ته د بېرته راستنیدوغوښتنه کوي.
