د چين د کمونېست ګوند د مرکزي کمېټې د سياسي بیورو غړي او بهرنيو چارو وزير وانګ يي د مارچ په ۲مې نېټې د عمان، ايران او فرانسې له خارجه وزيرانو سره جلا جلا ټيليفوني خبرې کړې دي.
د عمان بهرنيو چارو وزير بدر بن البوسيدي له وانګ يي سره په ټليفوني خبرو کې ويلي، چې د هېواد په منځګړيتوب يې د ايران او امريکا تر منځ خبرو کې بې ساری پرمختګ شوی و، خو امريکا او اسرائيل له نظره وغورځاوه او جګړه يې پيل کړه، چې دا ډېره د خواشينۍ او افسوس وړ ده.
نوموړي هيله ښودلې، چې چين به په اوسني حساس او پېچلي حالت کې مهم رول ولوبوي او په خبره یې، عمان به د چيني اتباعو او ادارو د خونديتوب لپاره پوره هڅې وکړي.
د ايران بهرنيو چارو وزير عباس عراقچي وانګ يي ته د سيمې د وروستي وضعيت په اړه معلومات ورکړي او ويلي يې دي، دا د امريکا دوهم ځل دی، چې له ايران سره د خبرو اترو پر مهال جګړه پيلوي او په خبره یې، ايران له خپل ټول ځواک سره د ځان دفاع پرته بل انتخاب نه لري.
هغه ويلي، چې چين د انصاف او عدالت پر دريځ ټينګار لري او د سيمه ييز تاوتريخوالي د زياتوالي په مخنيوي کې مثبت رول لوبوي.
د فرانسې بهرنیو چارو وزیر ژان نويل باروټ د منځني ختیځ پر اوسني وضعیت نظرونه څرګند کړي او یادونه یې کړې، چې امریکا او اسرائیل د ایران پر وړاندې د پوځي عملیاتو په اړه د ملګرو ملتونو له امنیت شورا سره مشوره نه ده کړې او نه يې هم اجازه ترې ترلاسه کړې ده.
نوموړي په ټينګار ويلي، چې ټولې خواوې باید د وضعیت خرابوالي د کمولو او د خبرو اترو له لارې د ايران د اټومي مسئلې د حل لپاره ګډ کار وکړي او هيله يې ښودلې، چې هېواد به یې له چین سره يو ځای د سیمه يېزو کړکېچونو د کمولو لپاره مثبت رول ولوبوي.
وانګ يي په ټليفوني خبرو کې د چين اصول او دریځ بیا تکرار کړی او د پوځي عملیاتو سمدلاسه درول او د شخړو د لا زیاتېدو مخنیوی يې تر ټولو بيړنۍ چاره یاده کړې ده او په خبره یې، نړیواله ټولنه باید د هر هېواد د هغه عمل پر وړاندې مقاومت وکړي چې له نړیوال قانون سره په ټکر کې وي. د ایران د اټومي مسئله باید بالاخره د سیاسي او ډیپلوماتیک حل لارې ته راوګرځي.
