د چین د کمونیست ګوند د مرکزي کمیټې د سیاسي بیورو غړي او بهرنیو چارو وزیر وانګ يي د مارچ په ۳مې نېټې د اسراییل له بهرنیو چارو وزیر ګيديون ساعر سره ټیلیفوني خبرې کړې دي.
ساعر خپل چيني سیال ته د منځني ختیځ د اوسني وضعيت په اړه مالومات ورکړي دي.
وانګ يي ويلي، چين د خبرو اترو او مشورو له لارې د نړیوالو او سیمه ییزو ګرمو مسئلو د حل ملاتړ کوي. د جنګ ښکېلې خواوې باید د ملګرو ملتونو منشور او اصول مراعات کړي، چې دا د اسراییلو په ګډون د بېلا بېلو خواوو له اساسي ګټو سره سمون لري.
نوموړي ويلي، چین له ډېرو کلونو راهیسې د ایران د اټومي مسئلې د سیاسي حل لپاره کوښښونه کړي دي او په خبره یې، د ایران او امریکا ترمنځ وروستیو خبرو کې ښکاره پرمختګ شوی و او د اسراییلو امنیتي اندیښنو ته هم پکې اشاره شوې وه. خو له بده مرغه، دغه پروسه د وسله والې شخړې له امله ځنډول شوې ده.
وانګ یي زياته کړې، چین د اسراییلو او امریکا لخوا د ایران پر وړاندې د هر ډول پوځي بریدونو مخالفت کوي او د جګړې د سمدستي بندولو غوښتنه کوي او موخه یې دا ده، چې د پوځي اقدام د لا زیاتېدو او د کنټرول له لاسه ورکولو مخنیوی وشي.
وانګ يي له اسراییل څخه غوښتي، چې د چینایانو او چیني ادارو د خوندیتوب لپاره واقعي تدبیرونه ونیسي.
ساعر ويلي، چې اسراییل د چینایانو او چیني ادارو خوندیتوب ته په ډېره درنه سترګه ګوري او ساتنه به یې وکړي.
