د چين د حکومت په سږني کاري راپور کې راغلي، چې د کمونېست ګوند د مرکزي کمېټې د وړانديزونو د عملي کېدو په موخه، د دغه هېواد د ملي اقتصاد او ټولنيز پرمختګ د ۱۵م پنځه کلن پلان مسوده کې ۲۰ مهم شاخصونه ټاکل شوي دي.
په دغو ۲۰ شاخصونو کې د اقتصادي ودې ۳ شاخصونه شامل دي او پکې مطرح شوي، چې کورنی ناخالص توليد باید په مناسبه ساحه کې وساتل شي او کلنۍ موخه يې باید د مختلفو کلونو د وضعيت له مخې وټاکل شي.
په دغو ۲۰ شاخصونو کې د نوښتګر پرمختګ په اړه ۳ شاخصونه شامل دي او موخه پکې ټاکل شوې، چې د ټولنې له لوري په څېړنېزه بودجه کې باید هر کال ٪ ۷ زياتوالی راشي.
په دغو شاخصونو کې د خلکو د ټولګټو او ښېګڼو په برخه کې د کارموندنې، عایداتو، ښوونې، طب، روغتيا او د زړو کسانو او ماشومانو د طبي بيمو په اړه ۷ شاخصونه او د زرغون پرمختګ او ټيټ کاربن په برخه کې د کاربن د اخراج او د چاپېريال ککړتيا د کمولو او د ايکولوژۍ او چاپيريال ساتنې په اړه ۵ شاخصونه ټاکل شوي دي او موخه پکې ټاکل شوې، چې د کورني ناخالص توليد د هر یونیټ لپاره به د کاربن ډای اکسایډ په اخراج کې ټولټال ٪ ۱۷ کموالی راشي او په مهمو ساحو کې به يې د زرغون پرمختګ لپاره هڅې دوام ولري.
په دغو شاخصونو کې د امنيت د تضمين په برخه کې د غلو دانو او انرژۍ د توليد د ظرفيت په اړه ۲ شاخصونه شامل دي او غوښتنه پکې شوې چې د ملي امنيت د تضمين بنسټ باید ټينګ وساتل شي.
