د چین سږنۍ دوو ملي غونډو، چې تازه پرانیستل شوي، د نړۍ پاملرنه راجلب کړې ده.
د چین حکومت د مارچ په ۵مې نېټې ملي ولسي کانګرېس ته کاري راپور وړاندې کړی او سږني کارونه او راتلونکی ۵ کلن پلان يې پکې په شرحه کړي دي او د کانګرېس غړي به یې تر سنجش، څېړنې او بحث لاندې ونيسي.
حکومت په کاري راپور کې د ناخالص کورني توليد سږنۍ پرمختيايي موخه له ۴ اعشاریه ۵ سلنې څخه تر ۵ سلنې پورې ټاکلې او پر دې يې ټينګار کړی چې د ښې پایلې لپاره به يې هڅې او کوښښونه وکړي.
د چین د اقتصادي ابادۍ پلان ته په کتو، د ناخالص کورني توليد سږنۍ پرمختيايي موخه تر ۲۰۳۵م کال پورې ورته موخې سره پيوست ده، بلکې بنسټ يې جوړوي.
د اقتصادي چارو شنونکي پر دې اند دي، که چین غواړي تر ۲۰۳۵م کال پورې د هر تن په سر ناخالص کورنی تولید يې د ۲۰۲۰م کال په نسبت دوه چنده شي او د منځنۍ کچې پرمختللو هېوادونو سویې ته ورسېږي، نو د اقتصادي زياتوالی یې باید په راتلونکو ۱۰ کلونو کې هر کال په منځنۍ توګه له ۴ اعشاریه ۱۷ سلنې زیات شي. نو ځکه د ناخالص کورني توليد سږنۍ پرمختيايي موخه يې د پنځلسم پنځه کلن پلان د عملي کېدو لپاره د بنسټ رول لري.
ډېرو بهرنیو رسنیو دا نظر ښودلی، چې سږ کال د چین د پنځلسم پنځه کلن پلان د عملي کېدو لومړی کال دی او د اقتصادي پرمختګ ( ۴ اعشاریه ۵ سلنې تر ۵ سلنې) موخه یې د دې څرګندويي کوي، چې د دغه هېواد د ابادۍ مفکوره کې کیفیت ته لومړیتوب ورکړل شوی او باکیفیته پرمختګ يې د یاد پلان کلیدي موضوع ده.
په یاد کاري راپور کې د پنځلسم پنځه کلن پلان په موده کې مهمې ستراتيژیکې دندې هم په ډاګه شوي او باکیفیته پرمختګ ته پکې پاملرنه شوې ده.
چین به له خپل باکیفیته پرمختګ سره نړۍ ته کوم فرصتونه برابر کړي؟
د چین د حکومت سږنۍ لومړۍ دنده په کوردننه د پياوړيو بازارونو جوړول او په ترڅ کې یې د خلکو مصرف هڅول دي. د چینایانو د مصرف اوسنی ګراف شاوخوا ۴۰ سلنه ښودل شوی، چې دا د نړۍ له منځنۍ سویې څخه ټیټ دی.
په یاد کاري راپور کې ويل شوي، چې د چين حکومت به په ښارونو او ښارګوټو کې د خلکو عواید زیات کړي او د توکو مصرفي سویه او د خدمتي چارو مصرفي کیفیت به يې لوړ کړي، چې دا به نړیوالو ته له چیني بازار څخه د ګټې اخیستې لپاره ښه زمینه برابره کړي.
نوښت او ابتکار د پرمختګ لومړی هڅونکی ځواک بلل کېږي.
په چین کې د مصنوعي ځيرکتيا سلګونه لوی موډلونه په کار لوېدلي او فعال شوي دي او په ډېرو سیمو کې يې ځیرک روبوټونه تر سترګو کېږي.
د چین د سږني دودیز پسرلني اختر په ماښامنۍ هنري ننداره کې د روبوټونو د وو شو نمایش د نړیوالو پراخه پاملرنه راجلب کړې ده.
د اولمپيک د نړیوال کمیسیون رئیسې کیرستي کوینترې ویلي، د میلان اولمپیک ژمنۍ لوبې د چین د ځیرکې ټکنالوژۍ پر مټ د تاریخ تر ټولو ځیرکې لوبې ګڼل کېږي.
د جرمني صدراعظم فیدرېش میرز څو ورځې مخکې چین ته د سفر په ترڅ کې د یونیتري روبوتیکس شرکت څخه لیدنه وکړه او د روبوټونو د چارو حیاتي ځواک یې له نږدې وکاته.
په یاد کاري راپور کې ویل شوي، حکومت به نوی خوځنده ځواک وهڅوي او پرمختیا به ورکړي او د ځیرک اقتصاد نوې بڼه به رامنځته کړي.
دا د دې ښکارندويي کوي، چې مصنوعي ځيرکتیا به بازار او د خلکو کورونو ته ورسېږي او په راتلونکي کې ښايي په پراخه کچه ځیرکه ټکنالوژي وکارول شي.
په دغه راپور کې ويل شوي، چین به د خدمتي چارو عمده بازار ته د داخلېدو او د ورخلاصون سویه نوره هم لوړه کړي او له نورو هېوادونو او سیمو سره به دوه اړخیزې همکارۍ او پانګونې لا پراخې کړي.
چین به د مخابراتي او بیولوژیکي چارو او د بهرنیو پانګوالو لخوا د روغتونونو د جوړولو په شمول ځینو برخو کې پرانیستي اقدامات غوره کړي، چې دغه ګام یې د بهرنيو تصديو پاملرنه راجلب کړې ده.
بهرنیو رسنیو ویلي، په نړۍ کې د پروټېکشنېزم د پورته کېدو په حال کې دي، خو چین بیا هم د لوړې سویې پر ورخلاصون ټينګار لري او په څو قطبي نړۍ کې د ګټې- ګټې په اړه ژمنې پوره کوي.
