کله چې امريکا او اسرائيل پر ايران بریدونه پيل کړي، هممهاله په لبنان کې هم جګړه سخته شوې ده. اسرائيل په لبنان کې ځمکني بریدونه پيل کړي او هڅې کوي، چې د دغه هېواد په جنوب کې د بفر زون يا حایله سيمه پراخه کړي.
د لبنان حزب الله پخوا ډېر زيانمن شوی، خو اوس يې بیا له اټکل وتلی جنګي توان ښودلی او د دواړو خواوو ترمنځ د شخړې پيمانه او شدت د بل هر وخت په پرتله سخت شوی دی.
شنونکي پر دې اند دي، چې حزب الله د نظامي جوړښت د بيا تنظيمولو له لارې جنګي توان پياوړی کړی دی. اسرائيلي ځواکونه نظامي فعاليتونه پراخوي او د بفر زون يا حایلې سيمې د پراخولو په هڅه کې دي او په راتلونکي اوږدمهال کې د دواړو خواوو ترمنځ د جګړې د دوام امکانات زيات شوي دي. د حزب الله دوامدار جنګي توان او له دغې ډلې څخه د ايران ملاتړ او د اسرائيلي ځواکونو د مرګژوبلې حالت به پر روانې جګړې اغېزې ولري.
د حزب الله جنګي توان له اټکل څخه پورته دی
اسرائيلو په تېرو څو کلونو او په تېره بیا د ۲۰۲۴م کال له سپتمبر څخه تر نومبر پورې د حزب الله کليدي غړي ووژل او دغه ډله یې سخته زيانمنه کړه.
اسرائيلي ځواکونو وړم کال د حزب الله پخوانی مشر حسن ناصرالله او هم هاشم صفي الدين، چې همغه مهال د ناصرالله ځای ناستی و، يو په بل پسې ووژل او وروسته يې د دغې ډلې نظامي مشران هم په نښه کړل.
داسې اټکل کېږي، چې اسرائيلي ځواکونو همغه مهال د حزب الله شاوخوا ۴۰۰۰ جنګيالي ووژل او د دغې ډلې نوي سلنه زېرمې يې له منځه يوړې.
حزب الله ډېر کمزوری شوی و، خو د ايران پر ضد د امريکا او اسرائيل د جګړې پر مهال بیا د جنګ ډګر ته ښکته شوی دی.
حزب الله وايي، د مارچ له ۲مې نېټې څخه د اپرېل تر لومړۍ نېټې پورې يې د اسرائيل دننه هدفونه په نښه کړي او د لبنان جنوب کې يې پر پلو اسرائيلي ځواکونو څه باندې ۱۳۰۰ ځلې بريدونه کړي، په لسګونو مرکاوا جنګي ټانکونه او نور پوځي وسايط يې په نښه او ويجاړ کړي دي.
د اسرائيل پوځ د روانې مياشتې په پيل کې ادعا کړې، چې د لبنان د حزب الله شاوخوا زر غړي يې وژلي دي.
حزب الله ګوند نظامي جوړښت بيا تنظيم کړی
شنونکي د حزب الله د جنګي توان د اعاده کېدو يو مهم لامل د نظامي جوړښت د بيا تنظيم چټکتيا یادوي.
د فرانسې نړيوالې راډيو په يوې تبصرې کې ويلي، چې د حزب الله نظامي او امنيتي اداره اوس د درېيم نسل د قومندانو په لاس کې ده. دوی ځوانان دي، په لوړې کچې یې زده کړې کړي او د ساينس او ټېکنالوژۍ مسلکي پوهې لري او مشرتابه یې د حزب الله جوړښت بيا تنظيم کړی دی.
د شنونکو په اند، پخوا به حزب الله د يوې مرکزي ادارې له لوري قومنده کېده، خو اوس يې هغه مرکز لغوه شوی او پر ځای يې د ډېرو کوچنيو څانګو له لوري په ګډه اداره کېږي او بېلا بېلې څانګې يې يو د بل د عملياتو په اړه معلومات نه لري او همدا په خپلو تشکيلاتو کې د اسرائيل د استخباراتي ادارې له لوري د نفوذ په مخنيوي کې مرسته کوي.
د يادونې ده، حزب الله ګوند د ايران په لوی ملاتړ خپل داخلي جوړښت بیا تنظيم کړی دی.
روېټرز خبري اژانس د څو سرچينو په قول خبر ورکړی، چې د ۲۰۲۴م کال په نومبر کې د لبنان او اسرائيل ترمنځ له اوربند وروسته په ډېر لنډ وخت کې د ايران اسلامي انقلابي ګارډ حزب الله ته شاوخوا ۱۰۰ نظامي قومندانان ليږلي او د نظامي روزنې او د لارښوونکي جوړښت د بيا تنظيم په چارو کې يې ورسره مرستې کړې دي.
درې لوی عوامل د جګړې پر جريان اغېزه لري
اسرائيل له مارچ راهيسې د ايران پر جنوبي سيمو د اوږدمهاله تيري نيت درلود، خو درېیو لویو عواملو د جګړې پر جريان اغېزه کړې ده.
۱. د لبنان حزب الله د اوږدمهالې جګړې لپاره پوره ځواکونه او نظامي تاسيسات لري. د اسرائيل د الما د څيړنې او ښوونې مرکز په يوه راپور کې ويلي، حزب الله له ۴۰ زرو څخه تر ۵۰ زرو پورې جنګيالي او له ۳۰ زرو څخه تر ۵۰ زرو پورې احتياطي جنګيالي لري.
ياد راپور وايي، دغه ډله شاوخوا ۲۵۰۰۰ راکټونه او ګڼ شمېر د لنډ او منځني واټن ويشتونکي توغندي او هره ورځ د لسګونو توغنديو د توغولو توان لري او برسېره پر دې دغه ډله تر يوې اندازې کروز توغندي، ډرونونه او نورې وسلې هم لري.
۲. ايران به له حزب الله ګوند څخه دوامدار ملاتړ وکړي.
د ايران عالي مشر مجتبي خامنه ايي په وروستيو کې د لبنان د حزب الله مشر نعيم قاسم ته په پيغام کې ويلي، چې د امريکا او اسرائيل پر ضد وجنګېږي او تهران به ترې اوږدمهاله ملاتړ وکړي.
۳. اسرائيل د خپل پروسنل څومره تلفات تحمل کولی شي، دا هم پر وضعيت ډېره اغېزه لري.
