سمنګان کې د ۲ پراختیايي پروژو چارې پیل شوې دي

د سمنګان د کلیو د بیارغونې او پراختیا ریاست ویلي، د حضرت سلطان او فیروزنخچیر ولسوالیو کې د ۳ میلیونه او ۴۶۹ زره افغانیو په لګښت د ۲ پراختیايي پروژو عملي چارې پیل شوې دي. د دغه ریاست مطبوعاتي مسئول، ثمرالدین شاهرخي، رسنیو ته ویلي چې یادې پروژې د ناروې په مالي ملاتړ پلي کېږي. د نوموړي په وینا، په لومړۍ پروژه کې د حضرت سلطان ولسوالۍ د شلکتو او نواباد کلیو ترمنځ د پنځه کیلومتره کلیوالي سړک بیارغونه او جغل‌اچونه، د ۱۰ متره اوږد او ۴ متره پلن واش جوړول او د دوو پلګوټو بیارغول شامل دي. هغه زیاته کړې، دویمه پروژه د فیروزنخچیر ولسوالۍ د چنارګي پایین په کلي کې د ۱۱۰ متره اوږد او ۳ متره لوړ استنادي دېوال جوړول دي، چې موخه یې د موسمي سېلابونو د زیانونو مخنیوی دی.