د چین دولت رئیس شي جین پینګ د اګست د ۳۱مې نېټې په ماسپښین د قرغېزستان په پلازمېنې بېشکېک کې د شانګهای همکارۍ سازمان د ۲۰۲۶م کال د سرمشريزې په څنډه کې د مغولستان له ولسمشر اوخناګین خورلسوح سره لیدلي دي.
شي جين پينګ له نوموړي سره په خبرو کې ویلي، چې چين مغولستان ته د ګاونډيانو په اړيکو او هم په ډيپلوماسۍ کې مهم مقام ورکړی او له دغه هېواد سره به په ګډه د ستراتيژيک متقابل باور د پياوړتيا، د متقابلو ګټورو همکاريو د ژورتيا، د خلکو ترمنځ د تبادلو د هڅولو، د دواړو هېوادونو ترمنځ د جامع ستراتيژيکو همکاریزو اړیکو ته د لا زيات حیاتي ځواک د ورکولو او د دواړو هېوادونو د ګډ برخلیک ټولنې د جوړولو لپاره ګډ کار وکړي.
شي جين پينګ ويلي، چين او مغولستان دې د خپلمنځي اړيکو د پرمختګ لپاره سياسي بنسټ پياوړی کړي او د يو بل خپلواکۍ، ملي حاکميت او ځمکنۍ بشپړتيا او د يو بل د اصلي ګټو او مهمو اندېښنو درناوی دې وکړي.
چين به له مغولستان سره د ستراتيژيو همغږي پياوړې کړي، د سوداګرۍ، انرژۍ او کانونو په برخو کې به ورسره دوديزې همکارۍ ته وده ورکړي او د کانونو، مصنوعي ځیرکتیا او ډیجیټلي اقتصاد په څېر نویو برخو کې به ورسره د زرغونو همکایو امکانات وپلټي.
د مغولستان ولسمشر اوخناګین خورلسوح ويلي، له چين سره دوستانه همکارۍ د مغولستان د بهرنیو تګلارو اصلي اصل دی او په خبره یې، مغولستان به له چین سره سیاسي متقابل باور نور هم پیاوړی کړي، په سوداګرۍ او پانګونې، صنعت، کرنې، کانونو او زرغون اقتصاد کې به ورسره همکارۍ نږدې کړي او دوه اړخیزې اړیکې به ورسره نوي پوړ ته ورسوي.
نوموړي ويلي، هېواد يې د یو چین پېژندنې پر اصل ټینګار لري او تایوان د چین د خاورې یوه نه جلا کېدونکې برخه بولي او په خبره یې، د شینجیانګ، شيځانګ او هانکانګ پورې اړوندې مسلې د چین داخلي چارې دي او نور هېوادونه پکې د لاسوهنې حق نه لري.
اوخناګین زیاته کړې، د رئیس شي جین پینګ ۴ نړیوال نوښتونه او د انسانانو د ګډ برخلیک ټولنې د جوړولو مفکوره د نړیوالې سولې او امنیت د ساتلو، د دوامدار پرمختګ د هڅولو او له نړیوالو ننګونو سره د مقابلې لپاره مهم اهمیت لري او مغولستان به له چین سره په ګډه دغه نوښتونه پلي کړي.
