پاکستان: امریکا دې بیا نظامي مرستې راسره وکړي موږ به ترهګر وځپو

پاکستان له امریکا غوښتي چې خپلې نظامي مرستې بېرته ورسره پیل کړي. د پاکستان د بهرنیو چارو وزیر چې دمګړی په امریکا کې دی او هڅه کوي د ټرمپ په اداره کې پاکستان ته تبلیغات وکړي وايي واشنګټن ته په کار ده، چې له پاکستان سره خپلې نظامي مرستې بېرته پيل کړي. دده په وینا د عمران خان په مشرۍ نوی حکومت د ترهګرۍ ضد مبارزې او په افغانستان کې د سولې راتګ ته ژمن دی او امریکا ته په کار ده، چې د باور فضا رامنځ ته کړي. محمود قریشي همدا راز ویلي چې افغان حکومت په خپلمنځیو اختلافونو بوخت دی، کمزوری دی او د ترهګرۍ ضد مبارزه کې بریالی نه دی، نو د امریکا د ماتې او افغان حکومت د کمزورۍ ملامتیا او پړه دې پر پاکستان نه اچول کېږي. هغه ویلي چې که له پاکستان سره د امریکا نظامي مرستې پيل شي نو اسلام اباد به د ترهګرۍ پر ضد مبارزه کې لاس ته راوړنې ولري.