وسله والو طالبانو خپلو جنګياليو ته ویلي چې د انتخاباتو پر امنیتي کارکوونکو او چارواکو بریدونه وکړي.
وسله والو طالبانو رسنيو ته په يوه استولې خبرپاڼه کې د ولسي جرګې راتلونکې ټاکنې دوکه او فرېب بللې او ويلي يې دي چې جنګيالي به يې د بريدونو پر مټ دغه ټاکنې ګډې وډې کړي.
طالبانو له خلکو هم غوښتي چې په ټاکنو کې دې ګډون نه کوي.
طالبانو تر دې وړاندې هم په ټاکنو کې ورته دريځ درلود او د ټاکنو پر ګڼو مرکزونو له بريدونو سره سره يې هم د ټاکنو د ترسره کېدو مخنيوی ونه شو کولی.
د ټاکنو خپلواک کمېسيون اوس هم وايي چې د شاوخوا نهو ميليونو رايه ورکوونکو لپاره يې رايپاڼې چاپ کړې او ټاکنې به پر ټاکلې نېټه ترسره کوي.
په همدې حال کې د کورنیو چارو وزارت ویلي چې د ولسي جرګې د ټاکنو د امنیت د ټينګښت لپاره به ټول افغان ځواکونه په لومړۍ درجه احضاراتو کې وي او په دې برخه کې بشپړ چمتووالی نيول شوی دی.
د کورنیو چارو وزارت د ویاند مرستیال نصرت رحیمې تېره اونۍ په يوه خبري کنفرانس کې ويلي وو چې د ۵۱۰۰ مرکزونو او د ۲۱۰۰۰ محلونو د امنيت د ټينګښت لپاره ۵۴۰۰۰ امنیتي ځواکونه ګومارل شوي دي.
د کورنيو چارو وزارت له ډاډ سره سره د يکشنبې په شپه د کابل ښار په زړه (درېيمه کارته) کې د ټاکنيزو شکايتونو کمېسيون د رييس عبدالعزيز اريايي پر کور د لاسي بمونو بريد وشو.
که څه هم اريايي يا د هغه د کورنۍ غړو ته په پېښه کې مرګ ژوبله نه ده اوښتې، خو پېښې د خلکو اندېښنې راپارولې دي.
د چارو شنونکی نظيم سمون وايي، په داسې حال کې چې پر ټاکنو باور وار له مخه له منځه تللی، که د ټاکنيزو مرکزونو د امنيت ټينګښت ته جدي پاملرنه ونه شي، نو افغانان به په ټاکنو کې ګډون ته زړه ښه نه کړي.
سمون مسير ورځپاڼې ته وويل، په مخکنيو ټاکنو کې هم ولس له ګڼو امنيتي ګواښونو سره سره د رایه ورکولو مرکزونو ته ولاړل، خو وروسته يې پر رايو معامله وشوه.
سمون زياتوي: «که اوس هم د ټاکنو د مرکزونو او رايه ورکوونکو د امنيت ټينګښت ته جدي پاملرنه ونه شي، نو فاسدينو ته به په ټاکنو کې د درغليو زمينه برابره شي او د خلکو پاتې لږ باور به هم له منځه ولاړ شي».
سمون وايي، که د ولسي جرګې راتلونکې ټاکنې په ښه ډول ترسره نه شي نو په ولسمشريزو ټاکنو کې به بيا هېڅوک ګډون کولو ته زړه ښه نه کړي.
د يادونې ده چې د ولسي جرګې ټاکنو ته له غزني پرته په ټول هېواد کې تر ۲۵۰۰ ډېرو کسانو ځانونه کانديد کړي چې ۴۰۰ پکې مېرمنې دي. ياد شمېر نوماندان د ولسي جرګې د ۲۴۹ څوکيو د خپلولو لپاره سيالۍ کوي.
