د امریکا ولسمشر ډونالډ ټرمپ د پاکستان له لومړي وزیر سره په خبرو کې ویلي، که زه وغواړم چې په افغانستان کې جنګ ختم کړم، نو دا کار به فقط لس ورځې وخت وغواړي، خو زه باید لس میلیونه افغانان ووژنم، خو دا کار نه کوم. ټرمپ دغه راز وویل؛ موږ په افغانستان کې تر ټولو ستر بم وکاراوه او موږ کولای شو چې همدا کار بیا بیا وکړو. نوموړي دغه راز ویلي چې دوی که له افغانستان څخه خپل ځواکونه وباسي، نو دا کار به د پاکستان په مشوره کوي.
د ټرمپ دغو خبرو ته سخت غبرګونونه ښودل شوي، خو تر ټولو له شرمه ډک او ذلیلانه غبرګون د ارګ د چارواکو دی چې په هېڅ ډول د افغانانو د ارادې او نظر څرګندونه نه کوي. د ټرمپ خبرې واقعاً وحشیانه او ظالمانه دي. دا رښتیا هم ډېره وحشیانه ده چې د یوه اټومي ځواک لرونکي هېواد ولسمشر د یو بل غریب او بې وسه هېواد د لسو میلیونو انسانان د وژلو ګواښ کوي. موږ پوهېږو چې امریکا داسې وسلې لري چې افغانستان غوندې هېواد پرې تباه کړي. له بله اړخه د امریکا تاریخ پر وحشت او جنایت ولاړ دی. د امریکا متحده ایالاتو بنسټ پر جنایت اېښودل شوی او د میلیونونو سره پوستو په وژلو سره یې خپل لومړنی ټاټوبی او دولت جوړ کړي دي. امریکا په جګړه او جنایت کې تر دې ځایه را رسېدلې ده او د خپل تاریخ ۹۳ سلنه وخت یې په جګړه کې تېر شوی دی. امریکا لومړنی هېواد دی چې اټوم بم یې کارولی دی او دغه راز ممنوعه وسلې یې کارولې او بشریت یې له ګواښ سره مخ کړی دی.
حیرانوونکې دا ده چې ټرمپ د خپلو مخالفینو نه، بلکې د لسو میلیونو افغانانو د وژنې او له جغرافیې د افغانستان د ورک کولو خبره کوي. داسې لکه له افغانستان او افغانانو سره چې په جګړه کې وي. دلته په کابل کې او په ځانګړي ډول محمد اشرف غني خلکو ته وايي چې د امریکا پر نیت شک مه کوئ، امنیتي تړون ورسره کوي او د امریکا پر هر جنایت چوپ دی. اوس یې د ټرمپ خبرو ته له شرمه ډک غبرګون ښودلی دی. یوه بې مانا او بې ارزښته اعلامیه یې خپره کړې چې پکې یې د وضاحت غوښتنه کړې ده. د څه شي وضاحت!؟ هر څه واضح دي او هېڅ شی وضاحت ته اړتیا نه لري.
که اشرف غني او نورو چارواکو د واک له پیل څخه تر اوسه د افغانانو د ارادې تمثیل کړی وی، نو ټرمپ به د پاکستاني چارواکو په مخکې د افغانان په اړه داسې وحشیانه خبرې نه وی کړې. که اشرف غني د جان کیري فیصلې ته نه وی تسلیم شوی، که یې په پټو سترګو او خاینانه ډول امنیتي تړون نه وی لاسلیک کړی، که یې پر خپله خاوره د بمونو د مور د استعمال هرکلی نه وی کړی، که یې د خپلو ښځو، ماشومانو او بېګناه وګړو پر وژنه ذلیلانه چوپتیا نه وی غوره کړې، که یې د خپلو امنیتي ځواکونو د بمبارۍ پوښتنه کړې وی، که یې د افغانستان پر سر له پاکستان سره د معاملې پوښتنه کړې وی، که یې د جنوبي اسیا لپاره د ټرمپ طرحه خپله نه وی ګڼلې او هرکلی یې نه وی کړی او که یې بالاخره د افغانانو د غیرت، تاریخ، عزت او ارزښتونو پر اساس دریځ نیولی وی، نو نن به ټرمپ زموږ په اړه داسې فرعونانه خبرې نه وی کړې.
د امریکا پر وړاندې د ملي یووالي د حکومت چاپلوسانه، مزدورانه او غلامانه چلند د دې سبب شوی چې اوس امریکا هم زموږ پر هېواد له پاکستان او نورو سره معامله وکړي او هم زموږ د لسو میلیونو انسانانو د وژنې او د نړۍ له نقشې د افغانستان د ورکولو ګواښ وکړي.
