کورنیو چارو وزارت: امنیتي ځواکونه د ټاکنو د امنیت خوندیتابه ته چمتو دي

کورنیو چارو وزارت وایي، افغان امنیتي ځواکونه خپله ټوله هڅه کوي چې د ټاکنو امنیت خوندي کړي او تیاری لري تر څو د ټولو هېوادوالو لپاره د امن ټاکنو زمینه برابره کړي. په خبرپاڼه کې د طالبانو وروستي ګواښ په اړه راغلي، چې په دې وروستیو کې طالب ترهګرو داسې ګنګوسې خپرې کړې، چې ښايي ټاکنې یوه بهرنۍ پروژه ده او د افغانستان په خلکو پورې تړاو نه لري. سرچینه زیاتوي، لکه څنګه چې دا ډله له تېرو اتلسو کلونو راهیسې د بهرنیو لپاره او د هغوی د موخو د پوره کولو لپاره لاس په کار دي، نو اوس هم غواړي چې د خلکو په وړاندې رواني – تبلیغاتي جګړه په لاره واچوي. خبرپاڼه زیاتوي، چې طالبانو یو ځل بیا هغه تکراري خبرې د یوې خبرپاڼه په قالب کې خپرې کړې کومې چې د دوی د بهرنیو ملاتړو له لوري ورته ویل شوې، چې دا کومه تازه موضوع نه ده. دا په داسې حال کې ده، چې وسله والو طالبانو د ولسي جرګې او ولسوالیو شوراګانو راتلونکې ټاکنې د لویدیځ او امریکا دسیسه بللې ده او ویلي یې دي چې دوی به دا پروسه ګډوډه کړي.