د وردګو يو شمېر اوسېدونکي وايي، که هلته د ملکيانو مرګ ژوبله ونه درول شي، واټونو ته به راووځي او د ژوند تر وروستۍ سلګۍ به د بې ګناه خلکو د وژنې د مخنيوي لپاره هڅې وکړي.
پرون د وردګو د بېلابېلو سيمو شاوخوا شپېتو کسانو په کابل کې په ګډه خبري ناسته کې له دولته وغوښتل، چې په دغه ولايت کې د ملکي وګړو د مرګ ژوبلې مخنيوى وکړي.
د جغتو ولسوالۍ اوسېدونکي او قومي مشر ننګيالي په دې ناسته کې وويل، چې په دغه ولايت کې په تېرو شاوخوا دوو مياشتو کې لسګونه ملکي وګړو ته مرګ ژوبله اوښتې ده.
هغه وايي چې د وردګو خلکو په تېرو ۱۷ کلونو کې ډېرې ستونزې وزغملې، خو نور روان وضعيت نه شي زغملى.
ننګيالى وايي: «کله چې طالب پر دوی (دولتي ځواکونو) کومه مرمۍ فير کړي، دوی د طالب پر ځای د عوام الناس قتل ته ملا وتړي او په اګاهانه ډول تر هغو ملکيان وژني او کورونه يې بمباروي، چې زړه يې غواړي؛ ښکاره بېلګه يې د ملا حافظ د کلي پېښه او غميزه ده.»
د روانې تلې مياشتې په لومړۍ ورځ په جغتو ولسوالۍ کې په هوايي بريد کې ١٢ ملکي وګړي وژل شوي دي.
قومي مشر ننګيالی وايي، د جغتو، دايميرداد او سيداباد ولسواليو لسګونه سپين ږيري او قومي مشران کابل ته درې ورځې مخکې راغلي، څو له ولسمشر محمد اشرف غني او په افغانستان کې د غوڅ ملاتړ ځواکونو له قوماندان سره وګوري، خو تر اوسه په دې نه دي بريالي شوي چې هغوی ته د وخت اخيستو پيغام ورسوي.
هغه وويل: «موږ له ولسمشر او د غوڅ ملاتړ ځواکونو له قوماندانه قناعت بخش او روښانه ځواب غواړو، چې ولې او په کوم جرم وژل کېږو.»
د سيداباد ولسوالۍ قومي مشر محمد صابر په پرونۍ ناسته کې وويل، چې د جغتو تر غمېزې وروسته هم د وردګو په ډېری ولسواليو او سيمو کې د ملکي وګړو مرګ ژوبله روانه ده.
دی وايي: «د ملکيانو د مرګ ژوبلې لړۍ روانه ده، تېره ورځ د سيداباد ولسوالۍ د سرې کلا په سيمه کې افغان ځواکونو پر يو کور د ډي سي مرمۍ برید وکړ، دوې ښځې په کې شهيدانې شوې، همدا راز د نرخ په صدمرده او جلرېز ولسوالۍ کې هم جګړه شوې او ملکي وګړو ته مرګ ژوبله اوښتې ده.»
وړمه ورځ د نرخ ولسوالۍ په “صدمرده” سيمه کې د ملي اردو ځانګړو ځواکونو په عملياتو کې لږ تر لږه درې ملکي وګړي وژل شوي دي.
د ياد ولايت قومي مشرانو په پرونۍ خبري ناسته کې وويل، په دغه ولايت کې پر ملکي اهدافو د بريدونو بندېدل، ملکي وګړو ته د مرګ ژوبلې اړولو درول او د هغو کسانو خوشي کول چې دولت بې ګناه نيولي، له دولت څخه د دوى غوښتنې دي.
د وردګو قومي مشرانو ګواښ وکړ، که چېرې ولسمشر او په افغانستان کې د مېشتو بهرنيو ځواکونو قوماندان له دوی سره ونه ګوري او پوښتنو ته يې قناعت ورکوونکی ځواب ونه وايي، واټونو ته راوځي او د خپلو ماشومانو د وژنې مخه نيسي.
