د هلمند په مرکز لښکرګاه کې د ولسي جرګې د یوه کاندید صالح محمد اڅکزي د ټاکنيز کمپاين پر دفتر ځانمرګي برید کې ۱۰ تنه وژل شوي دي.
په وژل شویو کسانو کې پخپله کاندید صالح محمد اڅکزی هم شامل دی. برید پرون ماسپښین شاوخوا درې بجې شوی دی.
چارواکي وایي چې په برید کې شاوخوا ۱۵ نور کسان ژوبل شوي هم دي.
دغه بريد تر هغه يوه ورځ وروسته دی چې وسله والو طالبانو د بريدونو پر مټ د ولسي جرګې د راتلونکو ټاکنو د ګډوډولو ګواښ وکړ.
د هلمند د پوليسو چارواکو رسنيو ته ويلي چې بریدګر د اڅکزي دفتر ته د مراجعینو په منځ کې داخل شوی او برید یې کړی دی.
دوی ويلي چې کاندید اڅکزی لومړی سخت ژوبل شوی و چې وروسته يې په روغتون کې ساه ورکړه.
د پوليسو د معلوماتو پر بنسټ، د پېښې ټپیان د امنیتي مامورینو له لوري په لښکرګاه کې روغتونونو ته لېږدول شوي چې د ځینو روغتیايي حالت د اندېښنې وړ دی.
په لښکرګاه کې د بېړنیو مرستو د رسولو د روغتون یوې سرچینې د نوم نه ښودلو په شرط ويلي چې د پېښې له ځايه د ۸ وژل شویو کسانو جسدونه او ۱۱ ټپیان ور وړل شوي.
عیني شاهدان وايي چې د اڅکزي په دفتر کې د هغه پلویان د هلمند له بېلا بېلو برخو څخه را ټول شوي وو.
پخواني ولسمشر حامد کرزي او ګڼو نورو سياسي څېرو بريد غندلی، شهيدانو ته يې جنت او ټپيانو ته يې د بېړنۍ روغتيا دعا کړې ده.
وسله والو طالبانو دوې ورځې مخکې د يوې خبرپاڼې په خپرولو سره ګواښ کړی و چې د ولسي جرګې ټاکنې به د بريدونو پر مټ ګډې وډې کړي.
طالبانو ويلي وو چې ټاکنې امريکايي پروسه او د خلکو د دوکه کولو هڅه ده.
په کابل کې د امريکا سفارت ويلي چې ټاکنې يوه مدني پروسه ده او د طالبانو بريدونه ښيي چې دوی افغانان وژني.
که څه هم په هلمند کې د پروني بريد پړه تر پرون ماښامه کومې وسله والې ډلې پر غاړه نه وه اخيستې، خو کتونکي يې اندېښمن کړي دي.
د کورنيو چارو وزارت په ځلونو ويلي چې د راتلونکو ټاکنو د امنيت د ټينګښت لپاره يې چمتووالی نيولی، خو وروستيو پېښو د کورنيو چارو وزارت پر ادعادوو هم خلک بې باوره کړي دي.
د روانې اونۍ په پيل کې د کابل ښار په زړه (درېيمه کارته) کې د ټاکنيزو شکايتونو کمېسيون د رييس پر کور لاسي بمونه وغورځول شول، تر دې پېښې وړاندې په مختلفو ولايتونو کې پر ټاکنيزو مرکزونو بريدونه شوي چې لسګونو کسانو ته يې مرګ ژوبله اړولې ده.
د چارو شنونکی حامد هاشمي وايي، د کورنيو چارو وزارت دې خلکو ته د کاذب ډاډ د ورکولو پر ځای د ټاکنو د امنيت د ټينګښت لپاره عملي او ګټور ګامونه پورته کړي.
د کورنيو چارو وزارت وايي، دوی د ټاکنو د امنيت د ټينګښت لپاره بشپړ چمتووالی لري، خو له نوماندانو غواړي چې د خپلو کمپايني غونډو په تړاو ورسره مخکې له مخکې معلومات شريک کړي، څو يې امنيتي ځواکونه د امنيت پر ټينګولو بريالي شي.
