د ټاکنو له را نږدې کېدو سره سم نا امني ډېره شوې ده

بهرنۍ رسنۍ په خپلو تحلیلونو کې لیکي چې په افغانستان کې په دې وروستیو کې ځانمرګي بریدونو او په ښارونو کې نښتې راکمې شوې وې، خو د ټاکنو له را نږدې کېدو سره سم، دغه ډول بریدونه ډېر شوي دي. د سرچینې په وینا دا مسئله به د ډېری افغانانو ژوند ته خطر متوجه کړي. رسنیو، په ارزګان، هلمند، پکتیا، ننګرهار او نورو ولایتونو کې د حکومتي سرچینو له خولې لیکلي چې وسله والو پر ځینو هدفونو بریدونه ډېر کړي دي او هڅه کوي د ټاکنو امنیت ګډوډ کړي. دغه راپورونو داسې مهال خپرېږي چې وسله والو طالبانو په یوه اعلامیه کې خلکو ته په ټاکنو کې د نه ګډون خبرداری ورکړی و. دوی ویلي وو، چې ولس دې په ټاکنو کې ګډون نه کوي ځکه وسله وال طالبان په ټول توان ددغه ټاکنو د مخنیوي هڅه کوي. له دې وروسته همدا پرون په هلمند ولایت کې پر یوه نوماند ځانمرګی برید وشو او ګڼو کسانو ته پکې مرګ ژوبله واوښته. د هېواد د کورنیو چارو وزارت بیا د طالبانو دغه ډول اعلامیې او ګواښونه تبلیغاتي جګړه بولي او په وینا یې دوی د ټاکنو د امنیت په برخه کې پوره هڅه کوي.