سعودي عربستان: د ترهګرۍ ضد مبارزه کې د افغان حکومت ملاتړ کوو

سعودي عربستان وایي د ترهګرۍ ضد مبارزه کې د افغانستان ملاتړ کوي. د سعودي عربستان د بهرنیو چارو وزارت له لوري په خپره شوې خبرپاڼه کې راغلي، چې ترهګرو پرون په هلمند ولایت کې د یوه نوماند پر ټاکنیز کمپاین برید وکړ. خبرپاڼه زیاتوي، دغه ډول بریدونه پر انساني حقوقو او انسانیت بریدونه دي او سعودي عربستان یې غندي. خبرپاڼه زیاتوي په افغانستان کې روانې جګړې د ټولو افغانانو ژوند تریخ کړی دی او له منځه وړلو ته یې اړتیا ده. سعودي عربستان وايي، دوی د ترهګرۍ ضد مبارزه کې د افغانانو تر څنګ ولاړ دي او د افغان حکومت ملاتړ کوي. په خبرپاڼه کې پر ښکېلو خواوو غږ شوی چې له جګړو لاس په سر شي او د سولې او مذاکراتو لاره خپله کړي.