سولې شورا: د سیاسي احزابو ملاتړ د سولې خبرې بریالۍ کولی شي

د سولې شورا وایي، د سولې له پروسې د سیاسي احزابو او څېرو ملاتړ په دغه پروسه مثبت اغېز لرلی شي. د یادې شورا ویاند سید احسان طاهري وایي، چې د سولې له پروسې د ټولنې د بیلابیلو اقشارو ملاتړ او د یادې پروسې په برخه کې د سیاسي څېرو او سیاسي احزابو هلې ځلې کولی شي، چې دغه پروسه بریالیتوب ته ورسوي. دا په داسې حال کې ده، چې یادې شورا پرون د هېواد له لسګونو سیاسي څېرو او د یو شمېر ګوندونو له مشرانو سره غونډه وکړه او د افغان سولې پروسې په اړه یې د دوی نظرونه وغوښتل. په دغه غونډه کې یو شمېر سیاسي څېرو د سولې له بهیر نه په ملاتړ څرګندولو سره وویل، چې لا هم د سولې لپاره یوه جامع طرحه نه ده جوړه شوې. دوی ټینګار وکړ چې په دې برخه کې د یوې جامع طرحې سخته اړتیا لیدل کېږي. د یادونې ده چې د افغان سولې لپاره د امریکا ځانګړی استازی زلمی خلیلزاد روانه اونۍ د سولې په اړه له افغان او پاکستاني چارواکو سره تر لیدنې وروسته نن سعودې ته رسېدلی دی او له سعودي مشرانو سره یې پر افغان سوله خبرې کړې دي.