ټاکنو کمیسیون: د غزني برحاله وکیلان به هلته تر ټاکنو پورې خپلو دندو ته دوام ورکړي

د ټاکنو خپلواک کمیسیون وایي، چې په ولسي جرګه کې د غزني د خلکو برحاله استازي به په یاد ولایت کې د ټاکنو تر ترسره کېدو پورې خپلو دندو ته دوام ورکړي. ټاکل شوې، د ولسي جرګې ټاکنې تر راتلونکو اتو ورځو پورې د هېواد په ۳۳ ولایتونو کې تر سره شي، خو د غزني ولسونه به د ځینو سیاسي کشمکشونو له امله له دې حقه بې برخې پاتې شي. په ورته وخت کې د غزني ولایت اوسېدونکي وایي، چې دوی به تر هغه خپله رایه ونه کاروي، څو پورې چې یې د حقه حقونو تضمین نه وي شوی. دوی خپل حق هغه وخت تضمین بولي چې ټاکنې حوزوي شي او هر قوم په ولسي جرګه کې خپل نفوس ته په پام استازي ولري. دا په داسې حال کې ده، تېر ځل ټاکنو کې د غزني اوسېدونکو چې اکثریت یې پښتانه دي هیڅ کوم استازی نه درلود. د یادونې ده، چې د ټاکنو د خپلواک کمیسیون د پرېکړې له مخې په غزني کې د ولسي جرګې او ولسوالۍ شوراګانو ټاکنې له ولسمشرۍ ریاست سره همهاله تر سره کېږي.