د راپورونو له مخې، ترکي چارواکو په دغه هېواد کې د ۲۰۱۶ ز کال په ناکامې کودتاه کې د لاس لرلو په تړاو د سلګونو نظامیانو د نیولو امر کړی دی.
د ترکیې د آر ټي اې خبري اژانس د خبر له مخې، د دغه هېواد چارواکو د ۲۳۳ هغو پوځي افسرانو او سرتېرو چې ډېری یې د شمالي قبرس اوسېدونکي دي، د نیولو امر کړی دی.
د دغه اژانس د راپور له مخې، په دغو کسانو کې ۱۰۰ تنه یې د ترکیې ځمکني پوځیان، ۴۱ تنه یې د دغه هېواد د هوایي پوځ افسران او سرتېري او ۳۲ تنه یې سمندري پوځیان دي چې د ۲۰۱۶ ز کال په ناکامې کودتاه کې پر لاس لرلو تورن شوي دي.
دا په داسې حال کې ده چې انقرې په امریکا کې مېشت د ترکیې د حکومت مخالف فتیح الله ګولن د ۲۰۱۶ ز کال په ناکامې کودتاه کې پر لاس لرلو تورن کړی، چې د دغه هېواد حکومت بیا بیا له امریکا د نوموړي د ورسپارلو غوښتنه هم کړې ده.
د ترکیې په یادې ناکامې کودتاه کې د دغه هېواد د پوځ یوې لویې برخې هم ګډون درلود، چې له ټانګونو، زغروالو ګاډو او الوتکو سره د دغه هېواد مهمو ښارونو ته راوتلي وو.
د ترکیې د آر ټي اې خبري اژانس د خبر پر بنسټ، د یادې ناکامې کودتاه په دې پېښه کې ۲۵۰ کسان ووژل شول او تر دوو زرو زیات ټپیان شول.
د ترکیې حکومت له دغې ناکامې کودتاه وروسته، د دغه هېواد په پوځ کې پراخ اصلاحات راوستل چې له کبله یې تر دې دمه په یاده کودتاه کې د لاس لرلو په تور ۷۰ زره کسان نیولي او تر ۱۷۰ زرو ډېر یې له دندو ګوښه کړي چې لویه برخه یې د دغه هېواد پوځيان دي.
بلخوا د ترکیې دغو اقداماتو په سیمه ییزه او نړیواله کچه پراخ غبرګونونه هم له ځان سره راوپارول، چې په لړ کې یې څو اروپایي هېوادونو د دغه هېواد حکومت د بشري حقونو او د بیان ازادۍ پر نقض تورن کړ او له اروپایي ټولنې سره د ترکیې د یوځای کېدو پر سر د خبرو د درېدو غوښتنه یې وکړه، چې لا هم د ترکیې او اروپایي هېوادونو ترمنځ دغه ستونزه پر ځای پاتې ده.
