تر سعودي او امریکا وروسته برېټانیا هم ویلي چې ایران د سعودي عربستان د تېلو پر تاسیساتو د وروستیو بریدونو مسوول دی.
د برېټانیا لومړي وزیر بورېس جانسن ویلي، برېټانیا دې پایلې ته رسېدلې چې ایران د سعودي عربستان د تېلو پر دوو سترو چاڼځایونو د سپټمبر د ۱۴مې د بریدونو مسوول دی او د امریکا په مشرۍ له هغو پوځي هڅو سره د یو ځای کېدو په اړه به غور وکړي، چې موخه یې د سعودي عربستان د دفاعي ځواک پیاوړي کول دي.
جانسن خبریالاتو ته ویلي، چې برېټانیا به له خپلو متحدینو سره کار وکړي څو په منځني ختیځ کې روان کړکېچ کم شي.
د برېټانیا دغه محافظه کار لومړي وزیر نه دي ویلي چې په دغو بریدونو کې د ایران د لاس لرلو په اړه کره شواهد لري او که نه، خو هغه خبریالانو ته په څرګندونو کې ویلي چې د دې ډېر احتمال شته چې د بې پیلوټه الوتکو او کروز توغندیو په ذریعه دغه بریدونه ایران کړي وي.
که څه هم ایران تر دې مهاله په رسمي ډول د برېټانیا د لومړي وزیر د دې ادعا په اړه عکس العمل نه دی ښودلی، خو له دې مخکې یې دا ډول تورونه په مکرر ډول رد کړي وو.
ایران دغه راز متحده ایالتونو ته خبرداری ورکړی چې پر دغه هېواد هر ډول برید به لویه جګړه پیل کړي.
د ایران ولسمشر حسن روحاني وړمه ورځ وویل چې بهرني ځواکونه دې د فارس له خلیجه ځان لرې وساتي او ټینګار یې وکړ چې د دوی حضور په سیمه کې د وسلو سیالۍ ته زمینه برابروي.
د روحاني له دې څرګندونو یوه ورځ مخکې د ایران د سپاه پاسداران انقلاب ځواک یوه جګپوړي قوماندان ویلي وو، چې ځواکونو یې د جګړې تمرینونه تر سره کړي او د هر ډول جګړې سناریو ته تیار دي.
د امریکا متحده ایالتونو او سعودي عربستان پر دې سربېره چې د دغو بریدونو مسوول یې ایران بللی، دا هېواد یې تورن کړی چې په یمن او سوریه کې جګړه مخ ته وړي.
په ورته وخت کې امریکا هڅې پیل کړې چې په فارس خلیج او هورمز تنګي کې د تېلو د کښتیو د آزاد تګ راتګ د خوندیتوب مسئله یقیني کړي.
دا په داسې حال کې ده چې ایران په دې وروستیو کې د برېټانیا د بیرغ لرونکې یوې کښتۍ په ګډون، د سوداګرۍ څو کښتۍ نیولې دي.
د امریکا ولسمشر ډونالډ ټرمپ د سپټمبر په ۲۰مه اجازه ورکړه چې په سعودي عربستان او متحده عربي اماراتو کې دې د امریکایي ځواکونو شمېر زیات شي.
