ملګري ملتونه: جګړه به یمن د نړۍ په تر ټولو بېوزله هېواد بدل کړي

که په یمن کې اوسنی وضعیت دوام وکړي، درې کاله وروسته به د نړۍ تر ټولو فقیر هېواد شي. د ملګرو ملتونو پراختیايي څانګې په یوه تازه راپور کې ویلي، په یمن کې اوسنی وضعیت د جدي اندېښنې وړ دی. ددوی په خبره په دې هېواد کې جګړې شدیدې شوې دي او د فقر کچه لوړه ده. سرچینه کاږي چې که وضعیت همداسې روان وي نو تر ۲۰۲۲ز کال پورې به یمن د نړۍ تر ټولو بېوزله هېواد وي. په دغه راپور کې راځي چې د جګړو له امله به په یمن کې د فقر کچه له ۴۷سلنې ۷۵سلنې ته لوړه شي. یمن له څو کلونو راهیسې د حوثي یاغیانو دجګړې شاهد دی. دغه ډله د ایران په ملاتړ د سعودي پلوه حکومت پر وړاندې جګړه کوي او سعودي عربستان ددغه جګړې د کنټرول لپاره یو ایتلاف هم جوړ کړی دی، خو تر دې دمه یې پر کنټرول نه دي بریالي شوي.