د يمن د بهرنيو چارو نوي وزير محمد عبداله الحضرمي خبرداری ورکړی چې دوی به د دغه هېواد د تجزيې هره هڅه شنډه کړي او هېچا ته به د دې اجازه ورنه کړي چې دغه هېواد ووېشي.
نوموړي د ملګرو ملتونو عمومي غونډې ته په وینا کې د ایران له ملاتړه پر برخمنو حوثیانو چې د يمن په شمال کې يې زياتې سيمې په کنټرول کې دي، هم توندې نیوکې کړې دي.
هغه دغه راز پر متحده عرب اماراتو هم نیوکه کړې چې د ده په خبره، د هغو ځواکونو ملاتړ کوي چې د يمن په جنوب کې د خپل دولت د جوړولو هڅه کوي.
محمد عبداله الحضرمي ايران په ټوله نړۍ کې د تروريزم عمده تمويلوونکى بللی او ټينګار يې کړی چې په يمن کې باید د حوثيانو کودتا ختمه شي.
هغه په ورته وخت کې له سعودي عربستان مننه کړې چې د حوثيانو پر وړاندې په مبارزه کې د يمن له هغه حکومت سره مرسته کوي، چې نړيوال يې په رسميت پېژني.
الحضرمي ویلي، د متحده عربي اماراتو لخوا د يمن په جنوب کې هوايي بریدونو د يمن ثبات کمزورى کړى دى. نوموړي ويلي چې د اماراتو “تهاجم” د سعودي عربستان په مشرۍ هغه پوځي ائتلاف هم زیانمن کړی، چې موخه یې د يمن له حکومت سره همکاري ده.
بلخوا په یمن کې حوثیانو ادعا کړې چې د سعودي عربستان پر پوله یې له یوه لوی برید وروسته د سعودي عربستان ډېر پوځيان نیولي دي.
د حوثيانو یو ویاند بي بي سي ته ویلي چې د سعودي عربستان نجران سیمې ته نږدې د سعودي ځواکونو دری لواوې ورته تسلیم شوې دي.
هغه زیاته کړې چې زرګونه سعودي سرتېري نیول شوي او ډېری وژل شوي هم دي، خو د سعودي چارواکو تر اوسه په دې اړه څه نه دي ویلي.
د حوثیانو ویاند سمونوال یحیی سریع ويلي: «له کله راهیسې چې د دوی جګړه پیل شوې وه، دا تر ټولو ستر عملیات وو او سعودي ځواکونو ته د سر او مال غټ زیان اوښتی دی».
د سعودي عربستان په مشرۍ پوځي ائتلاف چې متحده عرب امارات یې هم غړی دی، د يمن په رسميت پېژندل شوي حکومت په استازيتوب، له ٢٠١٥ ز کال راهيسې د حوثي ياغيانو پر وړاندې پر جګړه بوخت دى.
د يمن په کورنۍ جګړه کې لسګونه زره کسان وژل شوي او دغې جګړې په یاد هېواد کې د نړۍ په کچه تر ټولو ناوړه بشري ناورين رامنځته کړى دی.
