د تخار په رستاق ولسوالۍ کې د ولسي جرګې د یوې نوماندې ټاکنیز کمپاین ته څېرمه چاودنې درنه مرګ ژوبله اړولې ده.
د تخار د والي ویاند جواد هجري وايي چې په چاودنه کې ۱۲ کسان وژل شوي او ۳۲ نور ټپیان دي.
د رستاق مرستیال ولسوال جمعه خان رفعت هم ویلي چې په برید کې ۱۲ کسان وژل شوي او تر دېرشو ډېر نور ټپيان دي.
ویل شوي چې په وژل شویو کې د ملي امنیت يو سرتېری او په ټپیانو کې بيا دوه پوليس هم شامل دي.
د روان کال د تلې پر ۱۷مه د هلمند په مرکز لښکرګاه کې یوه ځانمرګي برید د ولسي جرګې ټاکنو ته نوماند صالح محمد اڅکزی او د هغه اته پلويان ووژل. څو ورځې وړاندې د ننګرهار په کامې ولسوالۍ کې هم د یوه نوماند پر کمپاین غونډه ځانمرګی برید شوی و چې ۱۴ کسان پکې وژل شوي وو.
د ولسي جرګې ټاکنې به د تلې پر ۲۸مه نېټه ترسره کېږي، چې د ولسي جرګې د ۲۵۰ څوکیو لپاره به له ټول هېواده کابو ۲۵۰۰ نوماندان پکې ګډون کوي.
تېره اونۍ وسله والو طالبانو د يوې خبرپاڼې په خپرولو سره خبرداری ورکړی و، چې د ولسي جرګې راتلونکې ټاکنې به د بريدونو پر مټ ګډې وډې کړي.
دوی ويلي وو چې ټاکنې يوه امريکايي پروسه او د خلکو د دوکه کولو هڅه ده چې په وينا يې طالبان به يې د ترسره کېدو مخنيوی وکړي.
