د ترکیې ولسمشر رجب طیب اردوغان خبرداری ورکړی چې ډېر ژر به د سوریې په شمال ختیځ کې چې زر امریکایي سرتېري هم پکې مېشت دي، پوځي عملیات پیل کړي.
ویل کېږي چې امریکایي سرتېري په دې سیمه کې له دې کبله ځای پر ځای شوي، چې د خپلو دوو متحدینو خو په خپلو کې رقیبانو (انقرې او د سوریې د کرد ځواکونو) ترمنځ کړکېچ کم کړي.
اردوغان په انقره کې د خپل واکمن ګوند غړیو ته په وینا کې ویلي، چې دغه پوځي عملیات به ډېر ژر پیل شي.
اردوغان زیاته کړې: «موږ د دغو عملیاتو لپاره تیاری نیولی، موږ د خپلو عملیاتو پلانونه بشپړ کړي دي. موږ لازم امرونه هم ورکړي دي».
اردوغان دغه راز له خپلو متحدینو هم غوښتي چې د کردستان د کارګرانو ګوند یا پي کې کې او د سوریې کرد ملېشو «وای پي جي» په تړاو خپل دریځ روښانه کړي.
د نوموړي له اعلان وروسته، د سوریې ډیموکراتیکو ځواکونو خبرداری ورکړی چې که انقره پرې هوایي او ځمکني بریدونه وکړي، د ترکیې پر وړاندې به پراخه جګړه پیل کړي.
له کردانو، عربانو او اشوري ملېشو څخه جوړ د سوریې ډیموکراتیک ځواکونه د هغه ائتلاف یوه برخه ده، چې د سوریې د حکومتي ځواکونو پر ضد جنګېږي.
دا په داسې حال کې ده چې د ترکیې ولسمشر بیا بیا په سیمه کې له کرد ځواکونو د واشنګټن د ملاتړ پر وړاندې خپله نارضایتي څرګنده کړې ده.
اردوغان داسې مهال په سوریه کې د پوځي عملیاتو خبرداری ورکوي چې واشنګټن ورسره د تېرې اګست میاشتې د هوکړې له مخې ژمنه کړې چې کرد ځواکونه به د ترکیې له پولو لرې ساتي.
د راپورونو له مخې، ترکیې له یوې میاشتې راهیسې خپل پوځي جزوتامونه او دفاعي تجهیزات دې سیمې ته د پرمختګ لپاره تیار کړي دي.
انقره د سوریې «وای پي جي» د کردستان د کارګرانو د ګوند «پي کې کې» چې له ۳۵ کلونو راهیسې د ترکیې پر وړاندې وسله واله مبارزه کوي، یوه څانګه بولي.
په داسې حال کې چې انقره او واشنګټن دواړه پي کې کې ترهګره ډله بولي، خو واشنګټن بیا د سوریې «وای پي جي» کرد ملېشو ته چې د پوځي هڅو محور یې په سوریه کې پر داعش راڅرخي، په یو بل نظر ګوري او د هغو ملاتړ کوي.
