عرب لیګ او فرانسه: ترکیه دې په سوریه کې خپل عملیات ودروي

عرب لیګ او فرانسې پر ترکیې غږ کړی چې په سوریه کې خپل نظامي عملیات ودروي. د عرب لیګ مشر په یوه اعلامیه کې ویلي ترکیه دې ژر تر ژره د سوریې په شمالي سیمو کې خپل نظامي اقدامات، هوايي بریدونه او روان عملیات ودروي. دده په خبره د ترکي ځواکونو د عملیاتو له امله سلګونه کسان بېځایه شوي دي او ښايي بشري ناورین رامنځ ته کړي. بل پلو د فرانسې ولسمشر ایمانویل مکرون هم د ترکیې دغه کار غندلی دی. دده په وینا ترکیه دې ژر تر ژره د کوردانو پر ضد عملیات ودروي. مکرون له ډونالډ ټرمپ سره هم خبرې کړې دي او وایي د سوریې کوردانو دداعش ضد جګړه کې همکاري کړې ده نو باید ملاتړ یې وشي. بل پلو د ترکیې ولسمشر رجب طیب اردوغان بیا د کورد وسله والو پر ځپلو ټینګار کوي. نوموړی دغه کسانو ته ترهګرو خطاب کوي او وايي چې باید کورد وسله وال وځپل شي.