کردیان: سوریه کې د ترکیې عملیاتو ۲۷۵ زره کسان بې کوره کړي

په سوریه کې د کرد جنګیالیو سیاسي استازولۍ د یوې اعلامیې په خپرولو سره ویلي چې د سوریې په شمالي سیمو کې د ترکیې د پوځي عملیاتو له امله د ۷۰ زره ماشومانو په ګډون شاوخوا ۲۷۵ زره کسان بې کوره شوي دي. اعلامیه کاږي، بشري مرستې کمې دي او ډیریو خیریه بنسټونو هم په یاده سیمه کې خپل فعالیتونه ځنډولي دي. د سرچینې په خبره، ډېریو بې کوره شويو د سړکونو پر سر او یا هم په مؤقتي ډول په ښوونځیو کې اړولي دي. دا په داسې حال کې ده چې امریکا له ترکیې د سملاسي اوربند غوښتنه کړې ده خو د ترکیې ولسمشر ویلي، دوی د چا فشار نه مني او د خپل هدف د تر لاسه کولو مخکې به هیڅکله اوربند اعلان نه کړي.