بېنوا د لوړو زده کړو خصوصي موسسې په کندهار ولایت کې د هېواد د لوړو زده کړو وزارت په منظورۍ، په ۱۳۹۴ لمریز کال کې پر فعالیت پیل کړی دی. د دې موسسې د محصلینو د چارو مرستیال ښاغلی نادرشاه نصرت وایي، بېنوا د لوړو زده کړو خصوصي موسسه له هماغه اوله بیا تر دې دمه دوه پوهنځي (انجنیري او کمپیوټر ساینس) لري. دی وایي، دواړه پوهنځي دوه دوه ډېپارټمنټونه لري، چې کمپیوټر ساینس پوهنځی (سافټویر انجنیرېنګ او نېټورکېنګ) او انجنیري پوهنځی (سېول انجنیري او د برق انجنیري) ډېپارټمنټونه لري. دی وایي، څلور واړه ډېپارټمنټونه یې فعال دي او عملاً محصلین پکې پر زده کړو بوخت دي.
ښاغلی نصرت وایي، په دواړو پوهنځیو کې یې د محصلینو شمېر ۵۰۰ کسانو ته رسېږي، چې ښځینه محصلینې هم پکې شاملې دي. دی وایي، د سږ کال کانکور یې لا تر اوسه نه دی اخیستی، چې د دې کانکور په اخیستو سره به یې د محصلینو شمېر نور هم لوړ شي. نصرت وایي، په بېنوا د لوړو زده کړو موسسه کې د تدریس چارې د ۳۵ په شاوخوا کې استادانو لخوا مخ ته وړل کېږي، چې د ماسټرۍ او لېسانس تر کچې پورې لوړې زده کړې لري. د ښاغلي نصرت په خبره، د استادانو له ډلې یې ځینې دایمي او پاتې نور یې قراردادي استادان دي چې یوازې د تدریس لپاره راځي. نوموړی وایي، تر اوسه پورې ښځینه استادانې نه لري.
د بېنوا له لوړو زده کړو موسسې څخه تر اوسه پورې دوې دورې محصلین فارغ شوي، چې ښاغلي نصرت یې د شمېر په اړه څه ونه ویل. دی وایي، په کور د ننه له ځینو پوهنتونونو سره ښې اړیکې لري چې ځینې کارونه د دغو پوهنتونونو له ادارو سره په همغږۍ مخ ته وړي. د لوړو زده کړو دغه موسسه د خپلو محصلینو لپاره یو مناسب کتابتون لري، چې د کتابونو شمېر یې د دریو زرو په شاوخوا کې دی. نادرشاه نصرت وایي، محصلین او استادان کولی شي چې وخت ناوخت له دې کتابتون څخه ګټه واخلي، مطالعه او څېړنه پکې وکړي. د نصرت په خبره، دواړه پوهنځي ځانګړي لابراتوارونه هم لري، چې محصلین کولی شي د نظري زده کړو تر څنګ، عملي زده کړې هم پکې وکړي.
بېنوا د لوړو زده کړو موسسه د ښځینه محصلینو لپاره د ترانسپورټ امکانات او د پوهنتون په د ننه کي امنه اکاډمیکه فضا لري. د دې موسسې د محصلینو چارو مرستیال وایي، په ټوله کې یې د نارینه او ښځینه محصلینو لپاره د موسسې په د ننه کې د زده کړو ښه چاپېریال او خوندي اکاډمیکه فضا برابره کړې ده، چې تر څنګ یې د محصلینو لپاره تر یوې کچې پورې هغه امکانات هم برابر کړي، چې محصلین ورته اړتیا لري.
بېنوا د لوړو زده کړو موسسې په ټوله کې د محصلینو لپاره پنځوس سلنه تخفیف په پام کې نیولی دی. نادرشاه نصرت وایي، کله چې محصل د لومړي ځل لپاره د زده کړو په موخه، په دغه موسسه کې نوملیکنه کوي او زده کړې پیلوي، دوی ورته پنځوس سلنه تخفیف ورکوي. له هغه وروسته بیا په بېلابېلو دورو کې ممتازو محصلینو ته له دې ډېر تخفیف ورکول کېږي. دی وایي، د ښځینه محصلینو لپاره ځانګړی تخفیف لري، چې ان ځینې یې پر شپېته، اویا او اتیا سلنه تخفیف په بېنوا د لوړو زده کړو موسسه کې زده کړې کوي.
دا چې په ډېری خصوصي پوهنتونونو او د لوړو زده کړو موسسو کې هغه کسان زده کړې کوي، چې د ورځې په اوږدو کې نورې بوختیاوې ولري او یا هم غواړي د یوه پوهنځي تر څنګ بل پوهنځی هم ولولي، نو بېنوا د لوړو زده کړو موسسې هم د خپلو محصلینو غوښتنو ته په کتو، درسي وختونه برابر کړي دي. نادرشاه نصرت وایي، دوی د ورځې په اوږدو کې دوه وخته محصلین د زده کړو لپاره راغواړي، چې یو د سهار لخوا او بل هم له غرمې وروسته.
که څه هم چې بېنوا د لوړو زده کړو موسسې تر اوسه پورې دوې دورې فارغان ټولنې ته د خدمت په موخه وړاندې کړي دي، خو د محصلینو چارو مرستیال یې وايي، تر اوسه پورې یې ورته د فراغت سندونه نه دي ورکړي. نصرت وایي، د دویمې دورې فارغ شویو محصلینو تحصیلي اسنادونه یې لا پروسس شوي نه دي او هغه چې کارونه یې خلاص دي، لوړو زده کړو وزارت ورته په دې برخه کې یو څه ستونزې جوړوي. دی وایي، دغه ستونزه یې ان له ولسمشر سره شریکه کړې ده. نوموړی وايي، که څه هم چې تر یوې کچې پورې یې کار کوونکي له دې پروسې سره یو څه نابلده دي، خو تر څنګ یې لوړو زده کړو وزارت هم په دې برخه کې ور سره همکاري نه کوي او په ډېره عادي مسئله یې اسنادونه بېرته ور ردوي. دی وایي، هڅه به وکړي چې خپلو فارغ شویو محصلینو ته ژر تحصیلي اسنادونه وسپاري، څو له خپل دې حق څخه برخمن شي.
نادرشاه نصرت د دولتي او خصوصي پوهنتونونو تر منځ د توپیر په اړه وایي، دا چې ټول پوهنتونونه او د لوړو زده کړو موسسې، د لوړو زده کړو وزارت په چوکاټ کې فعالیت کوي او یو ډول درسي نصاب لري، نو بیا یې تر منځ توپیر نه ویني. دی وایي، دا چې دغه څه په افغانستان کې یو څه نوي دي، نو د افغانستان عام خلک په دې اند دي چې دولتي پوهنتونونه تر خصوصي هغو غوره دي. نصرت وایي، دا چې خصوصي پوهنتونونه خلکو ته د پیسو په بدل کې زده کړې ورکوي، نو هڅه کوي چې تر ټولو ښه امکانات ورته برابر کړي او که امکانات ورته برابر نه کړي او د زده کړو کیفیت یې ښه نه وي، خپله محصلین هم اجازه نه ورکوي او غږ پورته کوي.
د بېنوا د لوړو زده کړو موسسې اداره وایي، راتلونکی پلان یې دا دی چې لومړی باید په موسسه کې د ودانیو شمېر زیات کړي، ځکه اوسنۍ ودانۍ یې له دې څخه د زیاتو پوهنځیو ظرفیت نه لري. د ښاغلي نصرت په خبره، کله یې چې دغه ستونزه حل کړه، له هغه وروسته به د نورو نویو پوهنځیو د تاسیس په اړه فکر کوي. نوموړی وایي، هڅه یې کړې ده چې د محصلینو لپاره د هغوی په خوښه د زده کړو زمینه برابره کړي او که د تدریس په چارو کې دوی له کوم استاد سره ستونزه ولري، د یوې اونۍ په اوږدو کې یې ستونزې ته رسیدګي کېږي او که د یوې اونۍ په اوږدو کې استاد په خپلو کړنو کې بدلون را نه ولي، نو هغه ده چې پر ځای یې بل استاد ور استول کېږي.
د دې موسسې اداره له لوړو زده کړو وزارت څخه غواړي چې د دولتي او خصوصي پوهنتونونو تر منځ توپیر ونه کړي او ټولو ته په یوه سترګه وګوري. دی وایي، وزارت ډېر کله له خصوصي پوهنتونونو او د لوړو زده کړو له موسسو سره د مور او میرې چلند کوي، چې په دې برخه کې یې ښه مثال د فارغ شویو محصلینو د تحصیلي اسنادونو پر وخت نه تاییدول دي، چې له کبله یې دوی د محصلینو له شکایتونو سره مخ کېږي او د کار په مارکېټ کې یې د پوهنتون او یا موسسې د بدنامۍ لامل کېږي. د بېنوا د لوړو زده کړو موسسې د محصلینو چارو مرستیال نادرشاه نصرت له لوړو زه کړو وزارت څخه غواړي، چې په دې برخه کې ور سره هر اړخیزه مرسته او همکاري وکړي.
