ځینې خلک تر نورو ډېر بریالي وي؟ ځینې خلک ولې تر نورو ډېرې پیسې ګټي، خوشاله ژوند کوي او په هماغومره کلونو کې تر نورو ډېرې لاس ته راوړنې لري؟ د بریالیتوب اصلي راز څه دی؟
د کتاب لیکوال وايي، زه ډېر کله خپل سیمینار په یوه کوچني تمرین پيلوم، له ګډونوالو پوښتنه کوم: «څومره خلک غواړي چې وزن یې کم شي؟ له پورونو خلاص شي؟ او مالي خپلواکي تر لاسه کړي؟»
بیا هم ټول مسک شي، ځینې لاسونه وپړکوي او ټول لاسونه پورته کړي. زه بیا ورته ووایم: «ډېر ښه! ټول خلک ښې موخې لري، موږ ټول ډېرې پیسې غواړو، له کورنۍ سره ډېر وخت غواړو، ځان چوست او چالاک غواړو او بالاخره مالي خپلواکي غواړو».
موږ ټول نه یوازې دا شیان غواړو، بلکې پر دې هم پوهېږو چې د تر لاسه کولو لپاره یې باید یوڅه وکړو. موږ ټول دا نیت لرو چې یوه ورځ به دا کارونه کوو، خو تر پیلولو مخکې یې پرېکړه کوو چې یوه لنډه رخصتي واخلو، ښایسته ځای ته لاړ شو، دا ځای زه «یوه ورځ ټاپو» بولم.
موږ وایو چې یوه ورځ به هغه کتاب ولولم. یوه ورځ به تمرین پيل کړم. یوه ورځ به خپل مهارتونه لوړ کړم او ډېرې پیسې به وګټم. یوه ورځ به خپل مالي حالت کنټرول کړم او له پوره به خلاص شم. یوه ورځ به هغه ټول کارونه وکړم چې موخې ته د رسېدو لپاره راته اړین دي، یوه ورځ.
نږدې ۸۰ سلنه خلک په همدې «یوه ورځ ټاپو» کې پراته دي. دوی فکر کوي، خوبونه ویني او د هغو شیانو په اړه خیالونه کوي چې یوه ورځ به یې کوي.
له دوی ګرد چاپېر څوک وي؟ په «یوه ورځ ټاپو» کې پراته نور خلک وي. په دې ټاپو کې د دوی د خبرو اترو موضوع څه وي؟ «پلمې» دوی ټول ګرد چاپېره ناست وي او په دې ټاپو کې د پاتې کېدو لپاره ځان ته پلمې لټوي. دوی له یو بله پوښتنه کوي: «ته ولې دلته یې؟»
د دوی ټول پلمې هم په اصل کې یو ډول وي: «زما ماشومتوب ښه نه و، ما ښې زده کړې نه دي کړې، زه پیسې نه لرم، زما رییس ډېر غوسه ناک دی، زما ګډ ژوند ښه نه دی، څوک مې قدر نه کوی، اقتصاد بیخي ډېر خراب دی».
دوی د پلمې پر ناروغۍ اخته دي. دا ناروغي سړی د بریالیتوب پر لار وژني، د دوی ټولو نیتونه ښه دي؛ خو پر دې ټول ښه پوهېږي چې یوازې ښه نیت هم په درد نه خوري.
د بریالیتوب لومړی اصل ډېر اسانه دی: «ځان د پلمو له ټابو څخه وباسئ!» پلمې مه کوئ! یا یو کار وکړئ، یا یې بیخي مه کوئ، خو پلمې ورته مه لټوئ. خپل ښایسته ماغزه د دغو پلمو او توجیو لپاره مه کاروئ، چې تاسې دا کار ولې نه کوی، یوڅه وکړئ، هر هغه څه وکړئ چې کولای یې شی، ځان ته دا خبره تکرار کړئ چې : «که کار کوم، زه به یې کوم!»
مینه وال کولای شي دغه کتاب پر اکسوس سربېره، د ښار په نورو لویو کتابپلورنځیو کې په مناسب قېمت تر لاسه کړي.
