جذاب او زړه راښکونکي خلک ډېری وخت ښه غوږنیوونکي دي او ډېر چانسونه په لاس ورځي. دوی ته داسې موکې ورکول کېږي چې ښايي نور خک هېڅکله دا چانسونه په لاس رانه وړي، دا ډول خلک ښايي د داسې کړنو له امله وبښل شي چې ښايي نور یې له امله اعدام شي.
موږ دلته د جذابوالي لس مهارتونه تاسې ته ښيو:
۱ـ خوندورې او خوښوونکې خبرې اترې هغه دي چې په هغه کې نه سیالي او نه هم ځان غوښتنه وي؛ بلکې د خبرو، نظرونو او احساساتو یوه ارامه تبادله پکې وي. ارامې خبرې وکړئ او مقابل لوري ته مو هم د خبرو کولو وخت ورکړئ. کله چې تاسې خبرې کوی او نور درته ښه غوږ وي، تاسې د ځان په اړه ښه احساس کوی، دا کړنه د بل په حق کې هم همداسې وګڼئ. کله چې یو څوک خبرې کوي او تاسې په بل څه مصروف وی، هغوی داسې ګڼي چې تاسې ورته ارزښت او درناوی نه لری. «لطفاً داسې مه کوئ.»
۲. پرته له دې چې د نورو په خبرو کې ور ولوېږئ، په دقت او بشپړه چوپتیا سره د هغوی خبرو ته غوږ ونیسئ، داسې چې د مخامخ کس له خبرو پرته هېڅ هم درته اړین نه دي. ښه اورېدونکی و اوسئ، څو مو د جذب کچه نوره هم لوړه شي. «ښه غوږ نیوونکی و اوسئ.»
۳. له مقابل لوري مو د هغه ټولنیز او علمي موقف ته په کتو د حال احوال پوښتنه وکړئ. د بېلګې په ډول، له هغوی وپوښتئ چې څه کار کوي؟ ژوند یې څنګه دی؟ په کاروبار کې خوشاله دي؟ او یا هم دېته ورته نورې. له پوښتنې کولو وروسته د هغوی خبرې په ښه دقت واورئ او داسې ښکاره کړئ چې د هغوی هره خبره تاسې ته ارزښت لري.
داسې نه چې مخامخ کس مو دهقان وي او تاسې ورنه د انجنیرۍ په برخه کې پوښتنې کوئ. ممکن ډېر مو داسې کسان لیدلي وي چې پر نورو د یو ډول ځان لوړ ګڼلو یا د ځان ډېر پوه ښکاره کولو لپاره د هغو مسایلو په اړه خبرې کوي، چې اصلاً یې مقابل لوری ورسره اشنايي نه لري. «دا بد عادت مو له منځه یوسئ.»
۴. د کېناستو پر مهال مو د بدن د برابرولو او کېناستو بڼه، مقابل لوري ته ستاسې علاقه ښيي. کوښښ وکړئ چې د مقابل لوري خبرو ته په کتو مو د بدن بڼه برابره کړئ. د بېلګې په ډول، د هغوی د خبرې د تایید پر مهال له هغوی سره د سترګو اړیکه ټینګه کړئ او سر مو د هو په بڼه وخوځوئ. د مقابل لوري د خبرو کولو پر مهال په منظم ډول کېناستل او یا هم ودرېدل نه یوازې دا چې ستاسې او مقابل لوري تر منځ د مینې اړیکه ټینګوي، بلکې ستاسې پر شخصي ثلیقې هم دلالت کوي.
۵. له مقابل لوري سره د هغه تر مسلک ورهاخوا هم وپېژنئ. د بېلګې په ډول، تر مسلک پېژندلو وروسته له هغوی وپوښتئ چې ژوند یې څنګه دی؟ کوم هدفونه لري؟ له چا سره اړیکې او ناسته پاسته لري؟ څه یې خوښېږي؟ کومه لوبه یې زده ده؟
په دې سره به له هغوی سره لا صمیمي او نږدې شئ. که ممکنه وي له هغوی سره یو ځای یو رسټورانټ ته د ډوډۍ لپاره لاړ شئ او یا هم یو ځای ته په چکر لاړ شئ.
۶. د نورو په نشتون کې په هغوی پسې خبرې مه کوئ. ځکه له تاسې سره ناست کس بیا داسې فکر کوي، چې که چېرې زه هم نه وم، په ما پسې به هم خبرې کوي. کوښښ وکړئ چې د نورو د ښو عادتونو ستاینه وکړئ او له بدو هغو یې څه ونه وايئ. «غیبت مه کوئ.» دا هېڅ ممکنه نه ده چې یوڅوک دې بې عیبه او پاک وي، هرڅوک یو نه یو عیب لري، که غواړی چې د هغوی عیب له منځه یوسی، ښه ده چې له نورو پټ او تنا هغه ته په ښه ډول ووایئ چې دا مو ښه عادت او یا هم کړنه نه ده، که یې له منځه یوسی او یا یې نور ونه کړی، په خلکو کې به محبوبیت پيدا کړی.
۷. د مقابل لوري په پاک زړه او پرته له چاپلوسۍ احترام وکړئ. چاپلوس کس ډېر ژر پېژندل کېږي او که د یو چا تر زړه هم ور تېر شي، هغوی شک پرې کوي او دا هرڅه ته یې په بله سترګه ګوري. «چاپلوسي مه کوئ.» چاپلوسي مو پر ځان باور هم له منځه وړي او تل بیا د نورو په تایید پسې ګرځی، که مو دا عادت خپل کړ، ژوند به ځان ته د دوزخ کنده کړی. «پوهېږم ستاسې هم چاپلوس کس نه خوښېږي.»
۸. مؤدب او با اخلاقه اوسئ. له نورو سره د خبرو کولو پر مهال منظم کېناستل یا ودرېدل، له هغوی سره د سترګو اړیکه ساتل، په دقت سره یې خبرې اورېدل، د خبرو چانس ورکول او د «لطفاً» او «مننه کوم» یا «موږ څه خدمت کولی شو؟» کلمې کارول ټول د احترام ښکارندويي کوي. «دې ټولو ته پام وکړئ.»
۹. له حساسو بحثونو ځان وساتئ. له یو چا سره د ښو اړیکو ساتلو او لومړیو لیدو کتو پر مهال ښه ده چې پر حساسو مسایلو لکه سیاسي، مذهبي او ټولنیزو هېڅ خبرې ونه کړئ. ځکه دا مسایل حساسیتونه را پاروي چې ډېری وخت د اړیکو پر خرابوالي تمامېږي. ممکن له ډېرو داسې پېښو سره مخ شوی یاستی. ښه ده چې له دې وروسته یې هېڅ ونه کړئ.
۱۰. دا زده کړئ چې څنګه له مقابل لوري خدای پاماني وکړئ. په پټه خوله یا یوناڅاپه پاڅېدو سره له هغوی سره خدای پاماني مه کوئ. ښه ده چې هغوی ته ووایئ، «په لیدو مو ډېر خوشاله شوم، بیا به انشاالله وینو، اوس موږ ته کوم خدمت شته!»
خو پام مو وي، دا کلمې هم خپل وخت لري، هسې نه د مقابل لوري خبره به خوله کې وي او تاسې ورته ووایی چې زه ځم کار لرم، ما ته خدمت شته. ښه ده چې د خبرو کړۍ مو په ښه ډول رابنده او د پاڅېدو او خدای پامانۍ پر مهال دا کلمې ووایئ.
د جذاب اوسېدو، ځان او نورو ته په ارزښت قایلېدو لپاره احترام مهم دی، نه کوم تکنیک. که غواړئ چې د نورو لپاره جذاب و اوسئ، همدا مهارتونه مو پياوړي کړئ.
