ډېر خلک فکر کوي چې د بریالیتوب لپاره باید نوي مهارتونه او لوړ هنر زده کړل شي؛ خو له دې نه دي خبر چې په ژوند کې د بریالیتوب لپاره باید له ځینو شیانو لاس هم واخلي. په ژوند کې د بریالیتوب لپاره شپه او ورځ په دې سوچ مه وهئ چې کوم او څنګه نوي مهارتونه زده کړی؛ بلکې له خپلو ځینو عادتونو تېر شئ او خپل بریالیتوب تضمین کړئ. بهانه کول ځان ته دوکه ورکول دي. کامیاب خلک بهانه نه کوي. د نورو د ملامتولو کوښښ هم نه کوي. هغوی مسوولیت منونکي وي او د بېځایه بهانو او دلایلو پر ځای، خپلې نیمګړتیاوې درک کوي او د هغې د اصلاح لپاره وسایل لټوي. هیڅ انسان پوره نه دی. هر انسان ښېګڼې او بدګڼې لري. که تاسې غواړی چې په هره برخه کې استاد او له هر پلوه پوره اوسی؛ نو دا هسې هوا ګزول دي. دا کار امکان نه لري. د ژوند هره برخه او هر حالت زموږ په کنټرول کې نه دی. تاسې د هر شي د کنټرول هڅه مه کوئ. دا تاسې ته بریالیتوب نه درکوي؛ بلکې تشویش، اندېښنه او خپګان درکوي.
