ډېره غوسه مو د زړه پر ناروغۍ اخته کوي

د ډاکټرانو له لوري په يوه طبي څېړنه کې ثابته شوې، چې غوسه (قهر) د زړه حملې او عصبي ناروغیو لامل کیږي. په امريکا کې څېړونکي دې پايلې ته رسېدلي چې که څوک پر غوسه کنټرول له لاسه ورکړي، نو د زړه پر حمله او فلج باندې د اخته کېدو له خطر سره مخ کېدای شي. د هاروارډ پوهنتون د عامه روغتيا څانګې يوې ډلې موندلې چې له غوسې وروسته په دوو ساعتونو کې د زړه حملې خطر پنځه برابره زياتېږي. دغې څېړونکې ډلې دا هم موندلې څومره چې يو څوک ډېر په غوسه کېږي، هغومره ورسره د دغه ناروغۍ خطر هم زياتېږي. څېړونکي وايي، د زړه حملې زیاتېدل په بېلابېلو کسانو کې توپیر لري، هغه کسان چې ډېر په غوسه کېږي، د هغوی چانسونه نسبت هغو ته چې لږ په غوسه کېږي، ډېر وي. ویل شوي پر هغو کسانو چې په کورنۍ کې یې نور کسان هم د زړه ناروغي ولري، د نورو خلکو په پرتله په اسانه د غوسې له امله د زړه حمله راتللی شي. مانا دا چې ډاکټران د زړه ناروغي تر ډېره ارثي هم بولي.