پاکستان او چین د افغانستان پر موضوع د همکاریو پر پراختیا او د افغانستان په مشرۍ او رهبرۍ د سولې د پروسې پر ملاتړ ټینګار کړی دی.
دا په داسې حال کې ده چې د پاکستان صدراعظم عمران خان دا مهال د یوه پلاوي په ملتیا پر دوه اړخیزو او سیمه ییزو مسايلو د خبرو لپاره د چین په ۴ ورځني سفر دی.
د پاکستان د بهرنیو چارو وزارت د عمران خان او د چین د ولسمشر ترمنځ تر لیدنې وروسته په خپرې کړې ګډې اعلامیې کې ویلي چې د پاکستان او چین مشرانو پر دوه اړخيزو اړیکو سربېره د سیمې، منځني ختیځ او نړۍ پر مسایلو هم خبرې کړې او په سیمه کې یې سوله او ثبات د ټولو په ګټه بللي دي.
د چین او پاکستان مشران د افغانستان پر موضوع د همکاریو پر پیاوړي کولو سلا شوي او د افغانانو په مشرۍ او رهبرۍ یې د سولې له پروسې ملاتړ ښودلی.
چین همدا شان د افغانستان او پاکستان د ګډ پلان «APAPPS» له مخې د پاکستان او افغانستان نږدې اړیکې ستایلې او د درې اړخیزو امنیتي، پرمختیايي او خپلمنځي اړیکو د پراختیا او په افغانستان کې د سولې او ثبات لپاره د پاکستان، افغانستان او چین د بهرنیو چارو وزیرانو په کچه د لیدنو کتنو د لړۍ د جاري ساتلو هیله يې ښودلې ده.
